Kryetari i Partisë Demokratike në Shqipëri Lulzim Basha ka uruar kryeministrin e ri të Kosovës Albin Kurti dhe qeverinë e tij në përmbushjen me sukses të përgjegjësive dhe tejkalimin e sfidave me të cilat përballet Kosova.
Ai në një postim në Facebook ka shkruar se suksesi i Kosovës është suksesi i Shqipërisë dhe i shqiptarëve kudo që ndodhen.
“Urimet më të mira shkojnë sot dhe për deputetët e kuvendit të ri të Kosovës. Jam i bindur se forcat politike në Kosovë do të mund të gjejnë gjuhën e përbashkët për tejkalimin e pengesave, duke vënë mbi gjithçka interesin më të mirë të Kosovës dhe qytetarëve të saj. Si gjithnjë në të kaluarën, të sotmen dhe në të ardhmen, unë dhe Partia Demokratike do të qëndrojmë fuqimisht në mbështetje të Kosovës dhe të qeverisë së saj me besimin e plotë se pas 25 prillit, do të bashkëpunojmë edhe më ngushtësisht për të përballuar së bashku çdo sfidë”, ka shkruar Basha.
Qeveria Kurti 2 u zgjodh sot në Kuvendin e Kosovës me 67 vota pro, 30 kundër dhe asnjë abstenim./KP