Emisari special i Bashkimit Evropian për dialogun Kosovë – Serbi, Miroslav Lajçak, menjëherë pas arritjes së marrëveshjes për dokumentet, e ka falënderuar të dërguarin e posaçëm amerikan për Ballkanin Perëndimor, Gabriel Escobar për angazhimin në dialog, raporton Gazeta Sinjali.
Përmes një postimi në rrjetin social Twitter, Lajçak ka falënderuar Escobarin për mbështetjen dhe angazhimin e diplomacisë amerikane në dialogun mes Kosovës dhe Serbisë.
“Falënderoj Gabriel Escobar dhe diplomacinë amerikane për angazhimin e tyre të fortë në mbështetje të dialogut të lehtësuar nga BE-ja”, shkroi Lajçak.
Ndryshe, përfaqësuesi i Bashkimit Evropian për Politikë të Jashtme, Josep Borrell, ka njoftuar se Serbia ka vendosur të pranojë dokumentet identifikuese të Republikës së Kosovës, duke bërë kështu që të hiqen pengesat për lëvizje të lirë për kosovarët.