Ambasada e Shteteve të Bashkuara të Amerikës (ShBA) në Kosovë është deklaruar lidhur me konfiskimin drogës të hënën në Lipjan.
Konfiskimin e mbi 2 tonë kokainë e ka quajtur sukses ambasada amerikane, duke theksuar edhe se luftimi i krimit të organizuar dhe trafikut të drogës kërkon vendosmëri dhe bashkëpunim ndërkombëtar.
Ambasada amerikane në një shkrim në Twitter ka thënë se konfiskimi i djeshëm është një fitore e madhe për sundimin e ligjit.
“Luftimi i krimit të organizuar dhe trafikut të drogës kërkon vendosmëri dhe bashkëpunim ndërkombëtar. Ju lumtë autoriteteve të Kosovës për konfiskimin e djeshëm të drogës në Lipjan – suksesi përmes partneriteteve globale midis Kosovës, Italisë, Shqipërisë, & DEA-s. Fitore e madhe për sundimin e ligjit”, thuhet në shkrimin e ambasadës amerikane.
Lidhur me këtë të hënën janë arrestuar 7 persona ku janë konfiskuar 400 kg narkotikë të llojit kokainë në vlerë të 20 milionë eurove. Prokuroria e Shtetit, Policia e Kosovës, Prokuroria e Posaçme e Shqipërisë dhe autoritetet e shtetit Italian në një konferencë për media kanë dhënë detaje rreth këtij rasti, që u tha se kamioni në të cilin ndodheshin narkotikët ishte nisur nga Brazili për në Kosovë.
Narkotikët që u konfiskuan në ish-fabrikën e “Coca-Cola”-s në Lipjan, u tha se ishte e fshehur dhe e kamufluar në pako të ngjashme me lloje të ndryshme të mishit. Autoritetet e Kosovës thanë se kishin qenë të njoftuar për këtë rast dhe se kanë zhvilluar masë të fshehtë me autoritet nga Italia dhe Shqipëria./KP
