Kryetari i Lidhjes Demokratike të Kosovës, Lumir Abdixhiku, është deklaruar pas takimit me kryeministrin e vendit, Albin Kurti dhe krerët e tjerë të opozitës, raporton Gazeta Sinjali.
Abdixhiku ka deklaruar se në takim kanë diskutuar për procesin e dialogut me Serbinë, duke theksuar se konsiderojnë se ftesa është e vonshme.
“Ky takim ishte informues për procesin e dialogut deri më tani. Konsideruam se kjo ftesë është e vonshme 2 javë pas takimit të Brukselit. Në ndërkohë partitë opozitare janë informuar në detaje nga ndërmjetësuesit ndërkombëtarë në masën shumë më të thellë se sa që bëri kryeministri sot”, deklaroi ai para mediave.
Tutje Abidixhiku tha se Kurti ua ka prezantuar atyre gjashtë pikat, që sipas tij tashmë janë të njohura për publikun.
Ai ka thënë se dialogimi i copëzuar, është në interes vetëm të Serbisë dhe jo i Kosovës.
“Besojmë se dialogimi i copëzuar, pjesë-pjesë i shkon në interes vetëm Serbisë. Sa më shumë që Kosova merret me marrëveshje teknike, atëherë e ushqen satus-quon”, ka thënë Abdixhiku.
Tutje ai ka bërë të ditur qëndrimin e LDK-së lidhur me dialogun.
“Ne i kërkuam kryeministrit që të jetë i guximshëm dhe të shkojë në dialog së bashku me aleatët tanë, së bashku me Shtetet e Bashkuara të Amerikës dhe të kërkojë marrëveshjen finale, me njohje reciproke në thelb të saj, me respektim të kushtetutës në thelb të saj dhe me respektim të integritetit territorial në thelb të saj. Marrëveshjen e tillë e mbështesim pa dallim”, tha kreu i LDK-së.