Qytetarët e Kosovës po përballen me reduktime të energjisë elektrike. Pa u bërë 24 orë nga njoftimi më 15 gusht për reduktime, Ministria e Ekonomisë tha se është gjetur zgjidhja. Së paku tash për tash. Megjithatë sot u raportua se reduktimet do të vazhdojnë dhe KEK-u ka dështuar ta rikthejë në punë B2-shin me kohë.
Sipas raportimit të Gazetës Nacionale, edhe blloku B2 i cili i prodhon 250 MWh energji elektrike nuk ka hyrë në funksion në kohën e paraparë. Për shkak të mosfunksionalizimit, thuhet se reduktimet e energjisë elektrike do të vazhdojnë, përkundër premtimeve të kryeministrit të vendit, Albin Kurtit, se “po bëhen përpjekje për të përmirësuar gjendjen elektrike.”
Gazeta Sinjali ka dërguar pyetje në KEK për të marrë një deklaratë në lidhje me raportimet për situatën energjetike në vend. Në një përgjigje me shkrim, Skënder Bucolli, zëdhënës në këtë korporatë tha se njësia B2 është në remont të rregullt dhe pa përmendur datë tha se pritet të lëshohet para përfundimit të muajit, që i bie brenda katër ditësh.
“Korporata Energjetike e Kosovës sipas licencës ka përgjegjësinë e prodhimit të energjisë elektrike dhe eksploatimit të qymyrit. Prandaj, askush nuk ka autorizim të deklarohet rreth operimeve, respektivisht të njësive prodhuese të KEK-ut. Njësia gjeneruese B2, – Kjo njësi gjeneruese me fuqi rreth 260 MW/h, sipas planit është në remont të rregullt, punimet janë në përfundim e sipër dhe pritet të lëshohet në operim para përfundimit të këtij muaji”, tha Bucolli për Sinjalin.
Sipas tij Korporata Energjetike e Kosovës aktualisht është duke operuar me dy njësi të TC-A-së me rreth 130 MW/h secila dhe një njësi të TC-B me rreth 260 MW/h. Pra në total rreth 520 MWh.
“Eksporti/depozitimi në KESH: KEK nuk është duke eksportuar sepse të gjitha tepricat e energjisë elektrike (gjatë natës) është duke i depozituar në KESH, vetëm në 5 ditët e fundit KEK ka depozituar mbi 5.500 MW. Ndërsa totali i depozitimit të energjisë elektrike në KESH deri më sot është rreth 130,000 MW
Remontet: Njësia gjeneruese A3, – është duke operuar me fuqi prej rreth 130 MW/h, gjendja e kësaj njësie paraqitet e qetë dhe stabile, referuar Bilancit Vjetor Energjisë Elektrike (BVEE) në fuqi kjo njësi parashihet që ta realizojë remontin e rregullt vjetor gjatë muajit Tetor, remonti mesatarisht zgjatë 20 ditë.”
Ndërkohë blloku A-5 është jashtë funksionit, pasi po zhvillohen procedurat e prokurimit.
“Njësia gjeneruese A4, – po ashtu është duke operuar me fuqi prej rreth 130 MW/h, gjendja e kësaj njësie gjithashtu paraqitet e qetë dhe stabile, referuar planit në fuqi kjo njësi parashihet që ta realizoj remontin e rregullt vjetor gjatë muajit Shtator i cili gjithashtu zgjate mesatarisht 20 ditë.
Për njësinë A-5 aktualisht janë duke u zhvilluar procedurat e prokurimit për remontin kapital dhe shumë shpejt pritet te përzgjidhet Operatori Ekonomik i përgjegjshëm për këtë aktivitet.”
Ndryshe, para disa ditësh, kryeministri Albin Kurti, ka thënë se reduktimet e rrymës dhe remonti në termocentrale, janë masa të domosdoshme për të përballuar importin e energjisë në muajt e dimrit.
Sipas tij, bashkëpunimi i shtuar me Shqipërinë për energjinë, ka ardhur për shkak të remontit në bllokun B2 të termocentralit Kosova B, dhe për shkak se blloku A5 në termocentralin Kosova A, nuk ka punuar.
Pavarësisht bashkëpunimit, ai ka thënë se reduktimet vetëm janë zbutur, sepse sasia e energjisë që bartet nga Shqipëria “nuk e plotëson në tërësi mungesën tonë për shkak se edhe vetë Shqipëria nuk po prodhon sa duhet për nevojat e veta”.