Kandidati i PDK-së për kryeministër, Bedri Hamza, sot do të prezantojë sloganin e partisë për zgjedhjet e 9 shkurtit dhe propozimin e tij për rritje të pagave për zyrtarët publikë
Partia Demokratike e Kosovës sot do të mbajë Konventën për Bedri Hamzën Kryeministër.
Në këtë konventë, e cila do të fillojë nga ora 17:00, kandidati i PDK-së për kryeministër, Bedri Hama, do ta shpalosë programin e tij për zgjedhjet nacionale të 9 shkurtit.
Gazeta Nacionale nga burimet brenda partisë më të madhe opozitare ka mësuar se në këtë konventë Hamza do të prezantojë propozimin e tij për rritje të pagave për zyrtarët publikë.
Deri me tani, të gjithë kandidatet për kryeministër i kanë dhënë propozimet e tyre për këtë çështje.
Ende nuk dihet se sa do të jetë përqindja e rritjes se pagave që do të propozojë Hamza.
Sekretari i PDK-së, Betim Gjoshi, ka bërë me dije se propozimi i kandidati të PDK-së për kryeministër për rritje të pagave do të jetë shumë më serioz se ai i kryeministrit Albin Kurti.
Në “Emisionin Special” të Klan Kosova, ai ka thënë se propozimi i kryeministrit Albin Kurti është qesharak.
“Për besë propozimet e pagave të zotit Kurti do të duken qesharake, atij ka me i ardhë marre, ndoshta nis dhe t’i ndërroj ato vendime, sepse tonat do të jenë shumë më serioze, punëtorët në Kosovë meritojnë më shumë”, ka thënë Gjoshi.
Gjithë struktura udhëheqëse e PDK-së ka ftuar simpatizantët e kësaj partie që të marrin pjesë në këtë konventë.
Një gjë të tillë e ka bërë edhe kryetari i PDK-së, Memli Krasniqi.
Në profilin e tij në “Facebook”, Krasniqi ka shkruar se me këtë konventë do të fillon misioni për një Kosovë më të mirë.
“Të dashur miq, Nesër, më 2 nëntor, nga ora 17:00, ju ftoj të gjithëve në Pallatin e Rinisë në Prishtinë, që të na bashkoheni në Konventën e Partisë Demokratike të Kosovës për Bedri Hamzën Kryeministër. Ejani të nisim bashkë misionin për një Kosovë më të mirë!”, ka shkruar Krasniqi.
Kandidati i PDK-së për kryeministër, Bedri Hamza, në muajin e fundit ka mbajtur mbi 10 punëtori me qytetarë dhe përkrahës të PDK-në në qytetet të ndryshme të Kosovës.
Këto punëtori i kanë shërbyer kandidatit të PDK-së për të diskutuar me qytetarët e Kosovës për brengat dhe shqetësimet e tyre.
Në këto takime është vërejt një pjesëmarrje e madhe e qytetarëve.
Para qytetarëve, Hamza është zotuar se qeverisja e tij do të jetë ndryshe nga ajo aktualja.
Takimin e fundit të këtij formati, ai e ka mbajtur të enjten në Fushë Kosovë.
“Në çdo komunë është i madh numri i qytetarëve që po na bashkohen. I tillë ishte edhe në Fushë Kosovë. Për secilin prej nesh është emocionues rrugëtimi i ri që kemi nisur, i cili do ta përcaktojë drejtimin e ri të shtetit tonë. Ne mund ta ndërtojmë një Kosovë më të mirë, të barabartë, të sigurt, të drejtë dhe me perspektivë për secilin qytetar”, ka shkruar Hamza në profilin e tij në “Facebook”.
Takimet të tilla ai ka mbajtur në Mitrovicë, Ferizaj, Gjakovë, Prizren, Pejë, Shtime, Dragash, Lipjan, Kaçanik, Kamenicë, Podujevë, Suharekë dhe Istog.
Konventa e Partisë Demokratike të Kosovës për Bedri Hamzën Kryeministër do të mbahet në ora 17: 00 në Pallatin e Rinisë, në Prishtinë./Demokracia