Ish-sekretari i Ministrisë së Drejtësisë, Ardian Bajraktari, në një bisedë për Albanian Post e ka cilësuar si të “pasaktë” pretendimin e kryeministrit Albin Kurti, kinse me Ligjin për Amnistinë i cili është votuar në vitin 2013 në Kuvendin e Kosovës nga 2/3 e deputetëve “janë amnistuar krimet serbe në Kosovë”, derisa për miratimin e këtij ligji, Kurti fajin ua ka faturuar partive opozitare.
“Referuar dispozitave të Ligjit për Amnisti ku theksohen veprat që amnistohen, si dhe nenit 4 Përjashtimet nga Amnistia, si dhe Qarkores së Gjykatës Supreme e ku e përbashkëta e tyre është se amnistia nga cilado vepër penale e përmendur në ligj nuk do të aplikohet për veprat penale që kanë rezultuar me lëndim të rëndë trupor ose me vdekje, ku krimet e luftës rezultojnë me këto pasoja, andaj një pretendim se krimet e luftës janë amnistuar është i pasaktë”, tha Bajraktari.
Për Bajraktarin, i cili tani ushtron profesionin e avokatit, amnistia mund të përkufizohet si përjashtim i kryesve të shkeljeve të ligjit, përkatësisht kryesve të veprave penale nga ndjekja penale, hetimi, por edhe vuajtja e dënimit.
“Sikurse e thekson edhe Gjykata Kushtetuese në Aktgjykimin e saj me nr. KO108/13, në pikën 92, ndër të tjera thekson se motivet për nxjerrjen e një ligji për amnisti janë të ndryshme, por në përgjithësi ligjet për amnisti nxirren për shembull gjatë konfliktit për t’i dhënë fund dhunës, si pjesë e një marrëveshjes paqësore, në mënyrë që të promovohet pajtimi mes palëve të përfshira”, ka shpjeguar ai.
Kurti fajëson opozitën për votimin e Ligjit për Amnistinë: U bë falja e krimeve serbe në Kosovë
Kryeministër i Kosovës, njeherit kryetari i Lëvizjes Vetëvendosje Albin Kurti, në mbledhjen e Këshillit të Përgjithshëm të kësaj partie, ka fajësuar partitë opozitare për votimin e Ligjit për Amnistinë.
“Më 11 korrik janë bërë 11 vjet prej kur prej procedurave të shpejtuara deputetët nga të gjitha partitë të cilët janë në opozitë sot, me 2/3 e votave miratuan Projektligjin për Amnisti që i fali krimet e Serbisë në Kosovë. Qeveritarët e asaj kohe e përshkruan ligjin si një akt të rëndësishëm politik, por qytetarët dhe organizatat protestuan kundër duke qëndruar ditë e natë para Kuvendit të Kosovës”, tha Kurti para bashkëpartiakëve të dielën.
Për Kurtin, “ironia bëhej edhe më fort”, sepse ligji në fjalë u votua pikërisht në ditën kur po shënohej përvjetori i gjenocidit të Serbisë në Srebrenicë, derisa ka theksuar se “në Kosovë miratohej amnistia e kriminelëve dhe të strukturave që kontrollohen nga Beogradi”.
“Qeveria jonë i ka shpallur organizatat e tyre “Mbrojtja Civile” dhe “Brigada e Veriut” organizata terroriste. Nuk ka amnisti, sepse ajo do të ishte padrejtësi ndaj viktimave dhe qytetareve. Ne konfirmojmë angazhimin tonë për drejtësi e cila është parakusht për paqe të qëndrueshme dhe për pajtim midis popujve”, potencoi lideri i LVV-së.
“I bëjmë thirrje organeve tona të drejtësisë që të jenë shumë më aktive në mënyrë që plagët e hapura nga krimet ndaj popullit tonë të mbyllen me drejtësi për viktimat dhe me ndëshkim ndaj kriminelëve”./Demokracia