Kryeministri i Kosovës, Albin Kurti ka folur për propozimin franko-gjerman për normalizimin e marrëdhënieve Kosovë-Serbi.
Kurti ka thënë se Kosova e sheh si bazë të mirë për negociata, por potencon se Serbia nuk është e interesuar për marrëveshje.
Kurti thotë se Vuçiq nuk është i interesuar për marrëveshje me Kosovën, por për prodhimin e krizave dhe pastaj kinse “menaxhimin” e tyre.
“Më 18 gusht të vitit të kaluar pati një takim novator me shefin e politikës së jashtme të BE-së, Josep Borrell. Së pari duhet të negociohet një marrëveshje kornizë ndërmjet Kosovës dhe Serbisë. Mendova se ishte e mrekullueshme. Por Vuçiq ka thënë vazhdimisht se nuk është i interesuar për një marrëveshje të tillë kornizë. Ai është i interesuar për menaxhimin e krizave, për fenomenin e zjarrvënësit dhe zjarrfikësit. Ju ndezni zjarre, pastaj vishni shpejt një xhaketë tjetër dhe thoni, unë mund ta shuaj zjarrin! Tre javë pas këtij takimi, përfaqësuesit e qeverisë franceze dhe gjermane, Emmanuel Bonne dhe Jens Plötner, erdhën këtu me ide që i konsideroj një bazë e mirë për diskutime të mëtejshme, sepse ato kanë të bëjnë me konceptet dhe idetë universale të integritetit territorial dhe sovranitetit, të drejtave të njeriut, pavarësinë dhe demokracinë. Në të kaluarën kishte më shumë ideologji për zgjidhjen e problemeve, një qasje “sui generis” me një oqean detajesh që dekurajonte të gjithë”, u shpreh Kurti.
I pyetur se çka ndodhi më pas, kryeministri thekson se që nga ai propozim, ka pasur vetëm një takim të nivelit të lartë në Bruksel dhe madje kishte edhe një plan paraprak për marrëveshje deri në mars ose prill të këtij viti.
“Kanë kaluar katër muaj që kur ata e bënë atë propozim – dhe ne kemi pasur vetëm një takim të nivelit të lartë në Bruksel. Madje, ne kishim një plan paraprak për të bërë marrëveshjen deri në mars ose prill 2023. Nuk e di se çfarë ndodhi ndërkohë. Nisma dhe vrulli janë rrëzuar. Më 27 tetor është mbajtur mbledhja e Këshillit të Sigurisë të Serbisë. Dhjetë ditë më vonë, më 6 nëntor, ministri i Jashtëm serb Ivica Daçiq tha se në atë takim u refuzua marrëveshja e planifikuar me Kosovën. Qeveria serbe me sa duket e njoftoi këtë vetëm dhjetë ditë më vonë, sepse ata ende donin të dukeshin mirë në samitin në Berlin më 3 nëntor. Në Berlin, ne përfaqësuesit e gjashtë vendeve të Ballkanit Perëndimor nënshkruam tri marrëveshje. Jam i shqetësuar”, tha Kurti për mediumin austriak “Der Standard”.