Trendi i parave të falsifikuara po vazhdon të ‘lulëzojë’ në Kosovë, ku qindra e mijëra euro fals vihen përditë në qarkullim në treg. Edhe rastet kur po kryhen shërbime në biznese të ndryshme me para të falsifikuara janë rritur, raporton Gazeta Sinjali.
Në para që dyshohet se janë të falsifikuara ka hasur edhe një punëtor i një pompe derivatesh në Obiliq.
Sinjali mëson se rasti është denoncuar edhe në Polici, ku sipas punëtorit dy kartëmonedha me të cilat kanë paguar klientë, dyshohet të jenë false. Paratë janë konfiskuar, teksa me urdhër të prokurorit është iniciuar rast ‘Falsifikim i parasë’.
E hetimet për veprën e njëjtë kanë nisur edhe për një rast tjetër i cili ka ndodhur po ashtu sot në një tjetër pompë derivatesh në fshatin Shupkovc të Mitrovicës.
Sipas punëtorit që ka pranuar pagesën, pasi klienti është larguar ka vërejtur se një 5-euroshe është e dyshimtë dhe për këtë arsye ka njoftuar Policinë. Kartëmonedha është konfiskuar dhe me urdhër të prokurorit është iniciuar rasti i njëjtë si më lartë.
Kujtojmë se falsifikimi i parasë është vepër penale dhe sanksionohet sipas Kodit Penal të Republikës së Kosovës. Kushdo që prodhon para të falsifikuara me qëllim për t’i vënë në qarkullim si të vërteta, dënohet me burgim prej një deri në dhjetë vjet.