Që nga përhapja e pandemisë në Kosovë, janë infektuar me COVID-19 mbi 3400 punëtorë shëndetësorë. Prej tyre 18 mjekë kanë vdekur si pasojë e infektimit me këtë virus, të cilët ishin aktiv në dhënien e shërbimeve shëndetësore. Oda e Mjekëve të Kosovës ka shpërndarëdekoratën Nderi i Mjekut “Ali Sokoli” si dhe dekoratën për arritje Shkencore “Musa Haxhiu”. Tutje, kjo odë po kërkon edhe mbështetje financiare për familjet të cilët kanë humbur gjatë kësaj periudhe anëtarët e tyre të cilët ishin në krye të detyrës.
Mezi flet kur kujton jetën e djalit të saj, doktorit të ndjerë Gëzim Berishës nga Peja. Nëna, Fatime Berisha thotë se e ka rritur djalin e saj me shumë mund, por që ndihet e lumtur për këtë nder që i është bërë familjes së saj.
Veç tjerash, tregon edhe për bisedat që kishte ditëve të fundit me Gëzimin.
Berisha: Edhe në gjysmë të natën e thirrshin
(Video)
“Shkoj tha një çaj me qit me qumësht, i tregova, kolli sa mujke e marrke. I thash çfarë ki, tha jo unë jam sëmur edhe e morra. Po ndasht tha pasi i shëndosha shumë e shumë. Se ka pas në gjysmë të natës e kanë thirr, besoni në Allah, veç e ka vesh jaknen dhe kush e ka thirr natën u qua edhe ka shkua edhe e ka shëruar popullin. Në fund na la krejt”, tregon ajo.
Nënë Fatimja nuk përmban dot lotët kur tregon se si djali i saj kishte thënë se ky virus, i cili po merr shumë jetë njerëzish, ia kishte sjellur “fundin” edhe atij.
Berisha: Tha nënë qiti qato sene që i ke pastruar edhe jeta për mua ka përfunduar
(Video) 01:00’…
“Sonte tha jam kujdestar, u shkua të shtunën të natën, ka nejt të dielën gjithë ditën edhe të hënën, ka ardh mesdita te dera. Tha nënë qiti qato sene që i ke pastruar edhe jeta për mu ka përfunduar. Thash mos bre nënë ku po donë me më lanë. Qashtu edhe baba i vetë ka shkua, e kanë zënë rob policia. Më ka lënë qyqe vetëm edhe në luftë kur u dalë. Ka dhënë shumë për Kosovën, shumë ka dhënë. Nuk di as me përshkruar, qysh nuk kam mund me ja ble as një palë të mbathura të mira”, ka shtuar ajo.
Ani pse e mërzitur, ajo uron për shëndet të mirë të gjithë mjekët të tjerë, të cilët edhe më tej po vazhdojnë luftën me këtë virus.
Berisha: InshAllah jeni gjithë stafi e na ndihmoni neve
(Video)
“InshAllah ju kemi juve të rinjve e na mbani, se mua më ka lënë keq fortë. InshAllah jeni gjithë stafi krejt të rinjtë e na ndihmoni e na mbani neve”, e përfundoi ajo fjalinë.
Kryetari i Odës së Mjekëve të Kosovës, Pleurat Sejdiu tha për KosovaPress se biografia e 18 mjekëve që ka humbur Kosova flet për një të kaluar, e cila tregon se të njëjtit ishin edhe pjesë e Ushtrisë Çlirimtare të Kosovës. Të njëjtën e kanë vazhduar, por tani duke u ballafaquar me pandeminë COVID-19.
Tutje ai thekson se janë duke pritur aprovim nga Komuna e Prishtinës për ndërtimin e një obelisku për këta mjekë.
Sejdiu: Zyrtarët e MSh-së po i ikin kësaj përgjegjësie
(Video) 05:57’…
“Dje e kemi pasur një leqe që janë munduar zyrtarët të MSh-së, të i ikin kësaj përgjegjësie. Do të vazhdojë të realizohet sepse është vendim i qeverisë, qoftë i kësaj në ikje apo në ardhje. E kemi përkrahjen e Komunës së Prishtinës, e cila do të na mundëson ngritjen e një obelisku që çdo herë në hyrje të spitalit të përkujtohen për sakrificën jo vetëm tash, por ndër vite në shoqërinë tonë”, tregon ai.
Sipas tij, çdo ditë në Kosovë infektohen së paku dy punonjës shëndetësorë, për çka shtoi se të njëjtit janë duke punuar tash e një vit në rrezik të madh. Për këtë, ai tha se Oda e Mjekëve janë duke kërkuar edhe një pension të pagës që kanë pasur më parë, për familjet e mjekëve të cilët kanë humbur ata.
Sejdiu: Propozimi jonë është që paga që ka qenë deri më tani të vazhdojë
(Video)06:40’…
“Propozimi jonë është që paga që ka qenë deri më tani të vazhdojë. Si prioritet ata të cilët kanë lënë fëmijë të vogël dhe të cilët kanë nevojë për një mbështetje së paku deri së paku të arrijnë maturitetin. Edhe ata të cilët kanë lënë prapa pasardhës, qoftë bashkëshort, nënë apo babë, të cilët kanë qenë të varur prej imputit të tij financiar. 18 rroga në muaj në Kosovë, zhduken ku jepen paga koti”, ka shtuar Sejdiu.
Familja e Fadil Zuka e Ali Tolajt ishin disa nga ata që morën dekoratë për familjarët e tyre mjekë që kanë humbur jetën gjatë pandemisë. Deri më tani në Kosovë janë infektuar mbi 1200 mjekë shëndetësorë, aktualisht janë të izoluar 40 mjekë, ku gjendja e tyre është stabile. /Sh.Pajaziti/KosovaPress