Në natën e fundit të festivalit ‘Sunny Hill’ që u mbajt në parkun e Gërmisë, Policia ka kapur në flagrancë me substanca narkotike gjashtë të rinj, në mesin e tyre edhe një i mitur, raporton Gazeta Sinjali.
Të dyshuarit që u kapën në raste të ndara, janë shoqëruar në stacion policor për intervistim, ku njëri prej tyre ka përfunduar në ndalim policor.
Burimet e Sinjalit bëjnë me dije se i dyshuari që u dërgua në mbajtje për 48 orë është një 19-vjeçar, i cili bashkë me dy persona të tjerë, të moshës së njëjtë po dyshohen për shitje, shpërndarje dhe blerje të narkotikëve.
Ndërsa tre të dyshuarit e tjerë janë ndaluar ndarazi nga Policia. Njëri është i moshës 17-vjeçare, i cili u kap me marihuanë, që u bë ‘sebep’ që mos ta shijonte festivalin, pasi u shoqërua në Polici.
Edhe në rastin tjetër, u ndalua një i ri, 20-vjeçar, të cilit me rastin e kontrollit policor u zbulua se posedon narkotikë. Zyrtarët policorë ia gjetën një sasi të marihuanës, që u konfiskuar, ndërsa ndaj tij u iniciua rast.
Ndërkohë, pas mesnatës, u kap edhe një 21-vjeçar, të cilit Policia ia gjeti disa cigare me marihuanë në xhep. Tre të dyshuarit e fundit do të hetohet për posedim të paautorizuar të narkotikëve.