Gazeta Sinjali raportoi mbrëmë për një incident që ndodhi të dielën në Klinikën e Psikiatrisë në QKUK, ku një person kishte shkaktuar probleme brenda hapësirave të klinikës, duke lëvizur me armë në brez. Paniku që i dyshuari L.K., shkaktoi, Sinjali merr vesh se lidhet me terapinë e tij. Burime nga kjo qendër kanë bërë me dije se i dyshuari që u denoncua në Polici kishte shkuar në këtë klinikë për të marrë terapinë dhe në mungesë të saj u bëri telashe stafit mjekësor.
Sipas informatave të para, përveç që mbante armë në brez, ai dyshohet se bashkë me një shok kanë tentuar të hyjnë me forcë në një dhomë dhe kanë kërkuar një dozë të ilaçit që klinika nuk e kishte. Kjo siç duket e ka mllefosur pacientin e dyshuar i cili e ka kërcënuar seriozisht një punëtore shëndetësore duke iu drejtuar “Çele derën e ama metadonin ose t‘likuidojmë”.
Përballë kësaj situate dhe rrezikut që i kanosej, viktima ka vendosur ta njoftojë Policinë dhe ta denoncojë të dyshuarin.
Me të marrë informatën, një njësi policore kanë shkuar në vendngjarje ku edhe kanë hasur në personin e denoncuar.
Gjatë kontrollimit të të dyshuarit zyrtarët policorë kanë gjetur një armë të zjarrit me disa fishekë, që janë konfiskuar më pas. Për shkak të posedimit të armës, ai është shoqëruar në stacion policor, për t’u trajtuar në cilësinë e personit te dyshuar.
Burimet e Sinjalit kanë bërë të ditur se përveç inicimit të rastit për posedim të paautorizuar të armës, Prokurori i Shtetit ka urdhëruar edhe nisjen e hetimeve për veprën penale kanosje për të cilën është dërguar në mbajtje për 48 orë.