Raportuesja e Parlamentit Evropian për Kosovën, Viola von Cramon, ka deklaruar se Qeveria e re e Kosovës duhet të vazhdojë dialogun me Serbinë dhe se Brukseli dhe Uashington janë të gatshëm të angazhohen me udhëheqjen e re, të zgjedhur në mënyrë demokratike.
Në një deklaratë me rastin e zgjedhjeve parlamentare në Kosovë, raportuesja e PE për Kosovën vlerësoi se aktivitetet zgjedhore ishin “kryesisht të rregullta”, por gjithashtu shprehu keqardhje për problemet me votimin e diasporës dhe parandalimin e të gjithë qytetarëve nga ushtrimi i të drejtave të tyre demokratike.
Von Cramon përgëzoi fituesin e zgjedhjeve, Lëvizjen Vetëvendosje, duke thënë se pjesëmarrja relativisht e lartë, mjedisi transparent dhe gjithëpërfshirës janë “një sukses për të gjithë vendin”.
“Ne presim që parlamenti i ri të formojë një qeveri të re me një shumicë të fortë dhe të qëndrueshme dhe të fillojë punën për një numër çështjesh urgjente në Kosovë, përfshirë reformat në sferën ekonomike dhe sociale, struktura të qarta qeveritare, përfshirë një kornizë institucionale për të mbështetur procesin e integrimit në BE”, tha Von Cramon.
Përveç kësaj, sipas saj, qeveria e re duhet të vazhdojë dialogun me Serbinë, pasi ‘pa ndonjë marrëveshje me Beogradin, stabiliteti afatgjatë dhe perspektiva evropiane nuk do të jenë të mundshme’.
“Komuniteti transatlantik në Bruksel dhe Uashington janë të gatshëm të angazhohen me udhëheqjen e re, të zgjedhur në mënyrë demokratike të Kosovës”, ka thënë Von Cramon.
Ajo theksoi se asnjë rekomandim i Misionit Evropian të Monitorimit nuk është zbatuar në Kosovë që nga viti 2019 dhe se përmirësimi i kushteve zgjedhore do të duhet të fillojë sa më shpejt të jetë e mundur./KosovaPress