Kryetari i Partisë Demokratike të Kosovës, Enver Hoxhaj, ka deklaruar se partia që e drejton nuk do të jetë pjesë e qeverisë me Lëvizjen Vetëvendosje, që ka dalë partia e parë në zgjedhjet e mbajtura sot.
Hoxhaj tha se rezultati i sotëm është mesazh i qartë për PDK dhe se e kanë pranuar si të tillë, teksa ka uruar Lëvizjen Vetëvendosje për rezultatin.
Kreu i PDK-së tha se Kosova ka nevojë për stabiliteti dhe është zotuar se si parti politike do të jenë faktor stabiliteti nga pozicioni i partisë kryesore në opozitë.
Ai tha se procesi i sotëm zgjedhor ka qenë shembull dhe se duhet të respektohet vullneti i qytetarëve.
Hoxhaj: Partia Demokratike e Kosovës nuk do të jetë pjesë e qeverisë me Lëvizjen Vetëvendosje
Video
“Rezultati i sotëm, e vë Lëvizjen Vetëvendosje të parën dhe PDK-në në pozitën e dytë, për ne është mesazh i qartë të cilin ne si kryesi e PDK-së e kemi pranuar si të tillë. Unë dua që ta uroj Lëvizjen Vetëvendosje për rezultatin dhe dua që t’i ftojë që të punojnë që më shumë ta forcojnë shtetin e Kosovës dhe institucionet e Kosovës. Natyrisht, Partia Demokratike e Kosovës nuk do të jetë pjesë e qeverisë me Lëvizjen Vetëvendosje, meqë ne kemi dallim të madh në orientimet tona politike, janë larg njëra-tjetrës dhe ne nuk bëjmë kompromis me vlerat mbi të cilat është ndërtuar dhe për të cilat qëndron PDK. Përtej kësaj, Kosova ka nevojë për stabilitet dhe ne zotohemi si PDK që të jemi faktor stabiliteti nga pozicioni i partisë kryesore në opozitës. Partia Demokratike e Kosovës do të bëjë përpjekje maksimale që të sigurojë funksionim normal të parlamentit, në mënyrë që të mundësohet prodhimi i rezultateve konkrete që rrisin mirëqenien e qytetarëve në planin afatgjatë”, tha ai.
Hoxhaj tha se kjo fushatë ka qenë e vështirë për ta marrë parasysh rrethanat e rënda nëpër të cilat tha se ka kaluar PDK-ja.
Hoxhaj: Jam krenar me unitetin dhe përkushtimin e pashembullt që keni treguar si PDK
Video
“Jam krenar me unitetin dhe përkushtimin e pashembullt që keni treguar si PDK dhe dua ta falënderojë secilin anëtarë të PDK-së në këtë drejtim për programin të cilin e kemi prezantuar të rimëkëmbjes dhe për pasionin dhe punën që kanë dëshmuar të gjithë anëtarët dhe mbështetësit e PDK-së në nivel të vendit gjatë zgjedhjeve të cilat janë mbajtur, gjatë fushatës zgjedhore, për këtë dua t’u shpreh atyre mirënjohjen sa më të thellë. PDK në këto zgjedhje ka qenë dhe mbetet e fortë, e bashkuar dhe edhe më tutje mbesim faktor i stabilitetit për shtetin e Kosovës dhe jemi të zotuar që ta rimëkëmbim Kosovën dhe këtë unë dua t’ia premtoj të gjithë qytetarëve dhe mbështetësve të PDK-së”, tha ai.
Hoxhaj nuk iu është përgjigjur pyetjeve të gazetarëve, duke thënë se për temat të cilat ata kanë pyetur do të përgjigjet nga nesër e tutje./M.Duraku/ KosovaPress