Ministri në detyrë i Shëndetësisë Armend Zemaj ka bërë të ditur se në 24 orët e fundit janë konfirmuar 246 raste me COVID-19 nga 3.031 teste dhe fatmirësisht nuk ka asnjë të vdekur.
“Brenda 24 orëve, kemi rekord testime që nga fillimi i pandemisë, 3.031 teste dhe nga këto mostra vetëm 246 kanë rezultuar pozitiv me COVID-19, apo në përqindje vetëm 8.1%, ndërsa asnjë qytetar nuk ka humbur jetën në betejën me COVID-19. Përgëzoj për punën e palodhshme Institutin Kombëtar të Shëndetësisë Publike në tërë Republikën e Kosovës”, ka thënë Zemaj, teksa ka kërkuar nga qytetarët që të respektojnë masat antiCOVID.
“Të dashur qytetarë, kjo situatë e kontrolluar epidemiologjike është arritur falë bashkëpunimit të të gjithëve. Respektoni rekomandimet antiCovid. Bashkë ia dalim”, shkruan Zemaj./KosovaPress