Hisen Berisha përplaset me Haki Abazin për veteranët, ia përmend fotografinë në Beograd.
Deputeti i PDK-së, Hisen Berisha është përplasur me deputetin e VV-së, Haki Abazi teksa replikonte me kryetarin e Kuvendit Glauk Konjufca për veteranët raporton Gazeta Express.
Berisha është përplasur me Haki Abazin e VV-së të cilit ia ka përmendur një fotografi të Abazit që qarkullon nëpër internet, ku Abazi në cilësinë e përfaqësuesit të Rockfeller kishte vizituar arkivat e ushtrisë serbe.
“Nuk e kam e lanë unë, keq është bërë 20 vjet, ku ke ti që s’e bëre, nuk kanë pasë kohë ata me shku në Beograd me bë harta me gjeneralë të Serbisë. Je kah flet me Hisen Berishën, kujdes”, i ka thënë Berisha deputetit të VV-së
Fillimisht kryetari Konjufca i tha Berishës se s’është në rregull të flitet për atë se kush ka qenë në luftë nga partitë.
“Në LDK e shoh një që ka qenë, VV pi shoh 5 e në PDK po i shoh 2. Kjo është gjendja aktuale qysh po i shoh tash, nuk bën me hy andej sepse ka nga grupet parlamentare që ofendohen, prandaj është gabim të folët në mënyrë monopolizuese, nuk është në rregull me fol prej dimensioneve të komplekseve kush ka qenë e kush s’ka qenë sepse prej të gjitha grupeve parlamentare këtu kanë qenë”, tha Konjufca.
Pasi mori fjalën e tij për replikë Berisha tha se i njeh veteranët nëpër parti prandaj s’e ka pasur për dikë në veçanti kur deklaroi se kompleksi që s’kanë marrë pjesë në luftën e UÇK-së i bën që t’i diskriminojnë veteranët nga përfshirja në pagën minimale
“Unë nuk e bëra thirrjen për veteranët që janë në sallë, se unë i njoh të gjithë problemi është se vendimmarrja e tillë është diskriminuese dhe ju e dini se kategoria më e diskriminuar janë pikërisht veteranët sepse e dijmë mirë se me 170 euro s’mund të jetojmë dy ditë, sepse kartelat tona na tregojnë tjera shifra të tjera në bankomat”, tha ai.
