Kryeministri i Kosovës, Albin Kurti, ka folur për RTP, Televizionin Publik Portugez.
Kryeministri Kurti ndër të tjera ka folur edhe për rëndësinë e anëtarësimit të Kosovës në NATO dhe BE.
Sipas Kurtit, bashkëpunimi i ngushtë ushtarak mes Rusisë dhe Serbisë në vitet e fundit duhet të konsiderohet me kujdes. Kurti tha se armatimi që Rusia i ofron Serbisë nuk është për parada, por për konflikte. Ai beson se sa më shpejt të integrohet Kosova, aq më e sigurt do të bëhet zona.
“Kosova duhet t’i bashkohet NATO-s. Kosova duhet t’i bashkohet BE-së”, ka thënë Kryeministri Kurti.
Kurti i kushtoi vëmendje bashkëpunimit të ngushtë ushtarak të Serbisë dhe Rusisë.
“Kremlini po përpiqet të përdor Serbinë si proksi për destabilizimin e Ballkanit. Ajo (Serbia) është duke blerë pajisje ushtarake nga Rusia. Nga 49 avionë luftarakë MIG-29 që i kanë, 8 kanë qenë donacion nga 6 nga Federata Ruse. Është krijuar një trupë ushtarake e përbashkët mes Rusisë dhe Serbisë dhe siç e shohim edhe në Ukrainë, i gjithë armatimi që është blerë nuk është vetëm për parada, por është për luftëra”, ka theksuar Kurti.
Kurti ka dhënë kritika për shtetet e BE-së që deri tani e kanë anashkaluar përgatitjen e përbashkët ushtarake të Rusisë e Serbisë përgjatë viteve të fundit
“Pajisjet ushtarake janë fazë përgatitore për makineri ushtarake. Shumë shtete të BE-së e kanë neglizhuar këtë përgatitje të përbashkët ushtarake mes Rusisë dhe Serbisë”, ka theksuar ai./Nacionale