Kryetari i Sindikatës së Re të KEK-ut, Nexhat Llumnica, ka kërkuar të hetohen të gjitha parregullsitë në konkursin e fundit në këtë kompani.
Ai ka treguar se punësimet që janë bërë në këtë konkurs janë të dyshimta.
Sindikalisti i ka treguar për gazetën Nacionale se punëtorët e rinj janë pranuar sipas avazin të vjetër, ku është dashur të kesh dikë të njohshëm për të marrë një vend pune në Korporatën Energjetike të Kosovës (KEK).
“E shohim si të gjitha konkurset e deritanishme. Pra, nuk ka ndonjë ndryshim, ku [edhe në të kaluarën] ose është dashtë të kesh dikë familjar që të ndihmojë ose është dashur të jesh militant i partisë në pushtet, për të marr vendin e punës”, thotë Nexhat Llumnica për Nacionalen.
Sindikalisti vazhdon të tregojë se sindikata e tyre vazhdimisht është mbajtur larg konkurseve gjë që ka ndodhur edhe kësaj here, ani pse ata kanë pritur që të jenë të përfshirë dhe të monitorojnë procesin e përzgjedhjes së punëtorëve të rinj në KEK.
Sipas tij, punëtorët e rinj janë të nevojshëm për korporatën energjetike, por është e papranueshme padrejtësia që është bërë në konkursin e fundit për punësimin e punëtorëve të rinj.
“Si sindikatë të gjitha informatat që kemi marr kanë qenë prej medieve. Neve na vjen keq që s’kemi qenë të përfshirë, ashtu i kemi marr informatat për procesin e përzgjedhjes së punëtorëve nga mediet, ashtu siç i kanë marrë të gjithë qytetarët”, ka vazhduar Lluminica.
Sindikalisti Llumnica tha se është për turp padrejtësia që është bërë në këtë konkurs dhe se kërkojnë fuqishëm të zhvillohen hetime dhe të ndërmerren masa ndaj atyre që manipuluan konkursin.
Atë e bënë me shpresë reagimet që janë bërë nga qytetarët dhe mediet karshi këtij konkursi dhe se ndoshta është mënyra se si të luftohet nepotizmi.
“Është ngritur goxha një zhurmë rreth këtij konkursi dhe mirë që ka reagime me qëllim që të eliminohet nepotizmi”, ka thënë Llumnica.
Ne si sindikatë nuk jemi të involvuar në asnjë konkurs dhe nuk kemi informata të mjaftueshme përveçse atë që dëgjojmë nga mediet dhe na vjen keq prej qytetarëve që ju bëhet padrejtësi dhe nuk janë të barabartë në konkurs.
Për sindikalistin është e domosdoshme që të vazhdohen hetimet për këto shkelje. “Unë jam i bindur se nepotizëm ka si gjithherë, por nëse gjenden edhe shkelje ligjore atëherë duhet të merren masa”, ka thënë ai.
Punëtorët e KEK-ut në gjendje të vështirë
Nexhat Lluminica ka folur edhe për gjendjen në KEK, ku, sipas tij, punëtorët e KEK-ut janë në gjendje të vështirë dhe se po përballen me mungesa të theksueshme.
Për të, angazhimi i punëtorëve të rinj në KEK është i domosdoshëm, por se gara duhet të jetë fer dhe pa intervenime të jashtme.
“KEK-u ka nevojë shumë për punëtorë, marrë parasysh mungesën e madhe që kemi në procesin e punës, prandaj çdo punëtorë i ri është i nevojshëm”, ka deklaruar Lluminica, duke insistuar se që përzgjedhja duhet të jetë profesionale dhe në mënyrë korrekte, pasi kjo do ndikonte në lehtësimin e punës për punëtorët momental, si dhe për sigurinë dhe efikasitetin e punës për punëtorët që do nisin punë në KEK.
Përveç konkursit e punësimeve të reja, Llumnica ka folur edhe për vështirësitë e punëtorëve në KEK, duke veçuar sëmundjet që ata përballen.
“Gjendja e punëtorëve në KEK nuk është e mirë për shkak të natyrës së punës që kanë me rrezikshmëri. Vetëm në vitin 2021 i kemi 35 raste të vdekjeve të punëtorëve që dyshohet se janë si rezultat i kushteve të rënda: pluhurit, gazrave helmuese, zhurmës, e dridhjeve”, ka treguar ai.
Sindikalisti Llumnica po ashtu përmendi moshën e lartë mesatare të punëtorëve në KEK si ndër problemet tjera që përballen punëtorët në KEK. “Të gjithë deputetët e popullit duhet të votojnë për lejimin e tërheqjes së një pjese të Trustit të kursimeve tona pensionale, pasi që 99% të punëtorëve kanë nevojë dhe në gjitha matjet tona (sondazhet) kanë dal 91% për tërheqjeje të një pjese të trustit, në ketë gjendje të rendë ekonomike. Tek e fundit ato janë kursimet tona, mos na i bllokoni kursimet tona, djersën tonë, sepse ne nuk harrojmë lehtë”, ka deklaruar Llumnica.
Ndër të tjera, ai ka kërkuar nga Qeveria e Kosovës që të lejohet sërish tërheqja e trustit.
Sindikata e Re ishte pjesë e protestave të organizuara nga Bashkimi i Sindikatave të Pavarura të Kosovës, ku bëhet thirrje për miratimin e Ligjit të Pagave, e po ashtu rritje e pagave për 100 euro për punëtorët e sektorit publik deri sa të miratohet ky ligj.
Konkursi i fundit në KEK ka nxitur reagime të shumta në opinion publik. Kjo pasi në media kanë raportuar se janë punësuar aktivistë e familjar të zyrtarëve të lartë të Lëvizjes Vetëvendosje.
Për këto dyshime prokuroria ka nisur një hetim, ndërsa subjektet opozitare dje kanë mbledhur nënshkrimet e nevojshme për formimin e një Komisioni Hetimor Parlamentar, i cili do t’i hetoj edhe parregullsitë që janë bërë në këtë konkurs./Nacionale