Policia e Kosovës është deklaruar pasi Express raportoi sot se një rrugë në afërsi të pikëkalimit kufitar në Bërnjak është bllokuar nga persona të panjohur.
Sipas policisë, ngjarja ka ndodhur në fshatin Bube të komunës së Zubin Potokut, e ku një patrullë policore ka vërejtur se në rrugë ishin vendosur disa pengesa me dru, që sipas tyre ishin vendosur për të penguar qarkullimin e automjeteve.
Policia sipas njoftimit ka larguar drunjtë dhe e ka hapur rrugën për qarkullim.
Njoftimi i plotë:
Policia Kufitare nga Stacioni i Zubin Potokut kanë intensifikuar patrullimet dhe aktivitetet patrulluese e hetimore me qëllim parandalimin e dukurive të kundërligjshme në kufi. Më datën 03.03.2022 në orën 20:15 , në fshatin Bube, komuna e Zubin Potokut, patrulla policore në rrugë ka vërejtur të vendosura disa pengesa me drurë të cilat ishin vendosur në rrugë me qëllim për të penguar qarkullimin e automjeteve.
Në vendin e ngjarjes kanë dalë edhe njësi të tjera patrulluese kufitare dhe kanë larguar pengesat (drunjtë) për të liruar për qarkullim rrugën dhe për të mundësuar lëvizjen e lirë në këtë lokacion.
Policia e Kosovës është duke kryer hetime lidhur me rastin përderisa është e përkushtuar drejt realizimit të objektivave strategjike për të parandaluar aktivitetet kriminale, kontrabandën dhe krimin transkufitar. Të gjitha veprimet policore ndërmerren në bashkërendim me autoritetet kompetente vendore./Telegrafi
