Ministrja e Drejtësisë, Albulena Haxhiu po e sheh shqetësues rritjen e rasteve të dhunës në familje, për çka ka paralajmëruar se do të ndërmarrin masa për adresimin e dhunës.
Kështu ka deklaruar Haxhiu pas takimit me mbrojtësit e viktimave të dhunës në familje, me rastin e përvjetorit të aprovimit të Konventës së Stambollit.
Në një prononcim për media, Haxhiu, tha se duhet bashkëpunim institucional për adresimin e rasteve të dhunës në familje, teksa shtoi se Qeveria Kurti ka prioritet adresimin e dhunës në familje.
Ajo bëri të ditur se dhuna në familje adresohet në prioritetet e Ministrisë së Drejtësisë, në mënyrë që numri i këtyre rasteve të jetë sa më i vogël.
Haxhiu: Do të ndërmarrim masa për adresimin e dhunës në familje
“Do të angazhohemi për ndërmarrjen e masave për adresimin e dhunës në familje, në mënyrë që rastet e dhunës në familje, rastet e dhunës në baza gjinore të ndëshkohen e jo të neglizhohen siç ka ndodhur në të kaluarën. Andaj, sot isha bashkë me Nitën, në vizitë tek mbrojtësit e viktimave, ku u njoftova me sfidat me punën e tyre. Dhe padyshim, për neve mbetet shqetësuese rritja e rasteve të dhunës në familje… Besoj që përmes punës tonë të përbashkëta rastet e dhunës në familje të jenë sa më të vogla dhe në anën tjetër të mbrohen viktimat edhe sipas legjislacionit në fuqi, dhe të krijohen kushte të barabarta në mënyrë që gratë të jenë të barabarta”, tha ajo.
Menaxheri i zyrës për ndihmë dhe mbrojtje viktimave, Basri Kastrati, tha se në institucionet e drejtësisë do të trajtohen pa asnjë neglizhencë të gjitha rastet e dhunës në familje.
Kastrati: Prioritet i joni është që zëri i viktimës të dëgjohet në procedurë gjatë gjithë kohës
“Sfidat që i adresuam bashkërisht, do të jenë prioritet i qeverisë, siç e tha edhe ministrja, dhe sigurisht që rastet e dhunës në familje nuk do të neglizhohen por do të trajtohen me shumë seriozitet nga organet e drejtësisë. E kur këtë ia shtojmë që ne jemi zëri i viktimës në procedurë, do të thotë viktima e ka një adresë të veçantë në kuadër të institucioneve të drejtësisë, në kuadër të Zyrës së Kryeprokurorit të shtetit dhe sigurisht që ato do të trajtohen pa neglizhencë gjithmonë. Prioritet i joni është që zëri i viktimës të dëgjohet në procedurë gjatë gjithë kohës”, tha ai.
Ministrja e Drejtësisë, Albulena Haxhiu e shoqëruar nga zëvendësministrja Nita Shala vizituan të premten edhe Qendrën për Mbrojtjen e Grave dhe Fëmijëve dhe Policinë e Kosovës./N.Jakupi/ KP