Presidenti i Shqipërisë, Ilir Meta thotë se “ndalimi i shpopullimit të Shqipërisë është drama më e madhe që i ka ndodhur vendit në dekadën e fundit e që kjo sipas tij është sfida më e madhe e cila kërkon reflektim urgjent.
Meta nëpërmjet një postimi në “facebook” ka shkruar se me këto ritme Shqipëria rrezikon të kthehet në një fatkeqësi kombëtare.
“Ndalimi i shpopullimit të Shqipërisë, dramës më të madhe që i ka ndodhur vendit dekadën e fundit, është sfida më e madhe, që kërkon reflektim urgjent dhe zgjidhje konkrete. Sipas Institutit për Studime Ekonomike Ndërkombëtare të Vjenës, nga viti 2010 deri në vitin 2019 janë larguar nga Shqipëria rreth 500 mijë qytetarë, disa herë më shumë në krahasim me Serbinë, Malin e Zi, Bosnjë-Hercegovinën, Maqedoninë e Veriut dhe Kosovën. Me këto ritme dramatike zbrazja e Shqipërisë rrezikon të kthehet në një fatkeqësi kombëtare. Adresimi i menjëhershëm i këtij fenomeni është emergjencë dhe çdo neglizhencë e mëtejshme do të kishte pasoja katastrofike”, shkruan Meta./KP