IBRAHIMOVIC “THUMBON” KEQ ZAPATAN

Zlatan Ibrahimovic nuk ishte me humor të mirë në minutat e fundit të ndeshjes së mbrëmshme, kur edhe iu drejtua Duvan Zapatas së Atalantas, me disa fjalë thumbuese.

Atalanta i dha leksion Milanit, duke e mposhtur në “San Siro” me rezultat 3-0 të shtunën në mbrëmje.

Sulmuesi kolumbian ishte ai që e mbylli ndeshjen, kur shënoi golin e fundit në minutën e 77-të.

Në fund të lojës, veterani suedez tentoi ta trazonte homologun e tij 29-vjeçar pas një goditjeje dënimi.

“Unë kam shënuar më shumë gola sesa që ke luajtur ti ndeshje në të gjithë karrierën tënde”, dëgjohet tek i thotë Ibrahimovic sulmuesit kolumbian Zapata.

Sulmuesi i Atalantas e injoroi këtë fjali dhe i ktheu shpinën Ibrahimovicit, duke mos e zgjatur problemin. /RTK