Qeveria Kurti nuk pritet të ngutet për vendosjen e reciprocitetit ndaj Serbisë. Për dallim nga e kaluara, ekzekutivi fillimisht do të përdorë mekanizmat ndërkombëtar si CEFTA për t’i trajtuar barrierat me shtetet fqinje, përfshirë Serbinë.
Ministrja e Industrisë, Ndërmarrësisë dhe Tregtisë, Rozeta Hajdari, pas mbledhjes së qeverisë së sotme, përmes një konference për medie, tha se nuk mund të bëjnë të ditur aplikimin e masave të reciprocitetit pa një analizë dhe shfrytëzimin e mekanizmave aktual.
Hajdari: Së pari do t’i përdorim mekanizmat ndërkombëtar, pastaj të shikojmë për reciprocitetin
“Për reciprocitetin ose më mirë të them për përmirësimin e bilancit tregtar që është prioritet i Ministrisë së Industrisë, Ndërmarësisë dhe Tregtisë jemi në analizën e të gjitha raporteve që kemi me shtetet fqinje në aspektin tregtar me qëllim të përmirësimit të bilancit tregtar. Ne shohim që kemi shumë barriera, jo vetëm me Serbinë, por edhe me shtete tjera rajonale. Mekanizmat të cilat janë për të trajtuar përmirësimin e marrëdhënieve rajonale në çështje tregtare është mekanizmi CEFTA, por edhe EFTA i cili pret për të nënshkruar marrëveshje me Kosovën. Ne së pari do t’i përdorim këto mekanizma se sa këto na mundësojnë neve çështjet e barrierave që i kemi me shtetet fqinje, jo vetëm me një. Unë sot nuk jam për të thënë se do të aplikojmë këtë, apo atë pa e shikuar mirë analizën dhe shfrytëzimin e mekanizmave aktual”, tha ajo.
Pas ndarjes së rreth 20 milionë eurove për sektorët e prekur nga pandemia Covid 19, ministri i Financave, Transfereve dhe Punës, Hekuran Murati tha se nuk mund të flasin për miratimin e një pako të re të rimëkëmbjes, derisa nuk ka një imunizim të plotë të qytetarëve ndaj koronavirusit.
Murati: Çështja e rimëkëmbjes ekonomike ka të bëjë më shumë me çështjen shëndetësore
“Çështja e rimëkëmbjes ekonomike ka të bëjë më shumë me çështjen e shëndetësore, se sa me vullnetin e qeverisë për të intervenuar me politika të reja fiskale. Pra pa u trajtuar problemi shëndetësor dhe pa u arritur niveli i duhur i imunizimit është vështirë të flasim”, tha ai.
Lidhur me integrimin e inspektorëve serbë të Mitrovicës veriore në institucionet kosovare, Hajdari tha se qëllimi është që të integrohen të japin llogaridhënie të qeveria Kurti.
Hajdari; Qëllimi është që ata të integrohet dhe të japin llogaridhënie të qeveria Kurti
“Qëllimi është që ata të integrohet dhe të japin llogaridhënie të qeveria Kurti, ashtu sic paguhen”, tha ai./E.Zeqiri/KP