HPV është aq i zakonshëm sa që pothuajse të gjithë burrat dhe gratë seksualisht aktivë infektohen në një moment të jetës. Grupi i viruseve Papillomavirusë (HPV) përbëhet nga më shumë se 100 lloje virusesh, nga të cilat afërsisht 40 mund të infektojnë zonën anogjenitale te burrat dhe gratë.
HPV më së shpeshti transmetohet gjatë marrëdhënieve. Shumica e njerëzve të infektuar me virusin e papillomës njerëzore nuk zhvillojnë kurrë simptoma ose probleme shëndetësore. Në shumicën e rasteve, HPV zhduket vetvetiu dhe nuk shkakton ndonjë problem shëndetësor.
Sidoqoftë, kur infeksioni HPV nuk zhduket, ai mund të shkaktojë probleme shëndetësore si lythat gjenitale dhe kanceri. HPV mund të shkaktojë kancer të qafës së mitrës dhe forma të tjera të kancerit, duke përfshirë kancerin e organeve gjenitale ose anusit. Gjithashtu mund të shkaktojë kancer në pjesën e pasme të fytit, duke përfshirë kancerin në rrënjët e gjuhës dhe bajamet (i quajtur kanceri i orofaringut).
Llojet e HPV
Ekzistojnë dy kategori themelore të llojeve të HPV, të quajtura “me rrezik të ulët” dhe “me rrezik të lartë”, varësisht nga fakti nëse ato çojnë në rrezikun dhe zhvillimin e kancerit te një person i infektuar.
Llojet HPV me rrezik të lartë 16, 18, 31, 33, 45, 52 dhe 58:
shkaktojnë afërsisht 90% të rasteve të kancerit të qafës së mitrës te gratë
shkaktojnë afërsisht 90% – 95% të rasteve të kancerit anal në gra dhe burra
shkaktojnë afërsisht 85% të rasteve të kancerit vaginal
shkaktojnë afërsisht 90% të rasteve të kancerit vulvar te gratë
Nga ana tjetër, llojet me rrezik të ulët të HPV 6 dhe 11, shkaktojnë afërsisht 90% të rasteve të lythat gjenitale tek gratë dhe burrat.
Lythat gjenitale
Lythat gjenitale zakonisht shfaqen si rritje me ngjyrë lëkure (me ngjyrë të verdhë-rozë në të verdhë-kafe) që mund të ngrihen ose të sheshtë dhe të vegjël ose të mëdhenj, dhe mund të ndodhin vetëm ose në grupe. Te gratë, lythat mund të rriten në qafën e mitrës, gjë që mund të jetë e vështirë të vërehet. Te burrat, ato mund të shfaqen në sipërfaqen e organit gjenital ose të ijës.
Trajtimi mund të jetë një proces i dhimbshëm dhe mund të përfshijë prerjen, ngrirjen ose djegien e lythave. Lythat gjenitale shpesh rishfaqen pas trajtimit, veçanërisht në tre muajt e parë.
Kanceri i qafës së mitrës
Kanceri i qafës së mitrës zakonisht ndodh në moshën e mesme – kur shumë gra rritin fëmijë dhe kontribuojnë në sigurinë ekonomike dhe financiare të familjeve të tyre.
Kanceri i organit femëror
Shumica e rasteve të kancerit të tillë zakonisht zhvillohen në lëkurën që shtrihet afër qafës së mitrës.
Më shumë se 70% të rasteve regjistrohen te gratë më të vjetra se 60 vjet.
Kanceri i vulvës
Zhvillohet vetëm jashtë organit femëror, në një zonë të quajtur vulvë. Zakonisht, kanceri i vulvës te gratë më të reja shoqërohet me infeksion me lloje me rrezik të lartë të HPV.
HPV është një faktor rreziku më pak i mundshëm te gratë në moshë.
Kanceri i anusit
Kanceri anal zhvillohet në zonën e anusit, që është hapja e pjesës së poshtme të zorrës së trashë.
Kanceri i organit mashkullor
Është i rrallë dhe më së shpeshti prek burrat midis moshës 50 dhe 70-vjeç.
Kanceri i fytit
Shumica e llojeve të kancerit të kokës dhe qafës shoqërohen me konsum të lartë të duhanit dhe alkoolit. Sidoqoftë, një analizë e fundit tregoi se 72% e rasteve të karcinomës invazive të qelizave skuamoze orofaringale janë HPV pozitive. Në pothuajse dy të tretat e këtyre mostrave, studiuesit gjetën llojet e HPV 16 dhe 18. /KP