Partia Demokratike e Kosovës sot do të dorëzojë kërkesën në kryesi të Kuvendit që javën e ardhshme të mbahen tri debate parlamentare, e që kanë të bëjnë me çështjen e vaksinave, arsimin dhe gjendjen ekonomike.
Shefi i grupit parlamentar të PDK-së, Abelard Tahiri, tha se kërkesën do ta deponojnë sot në kryesi të Kuvendit.
“Ti thërrasim tri debate parlamentare, e para është për dështimin e qeverisë për sigurimin e vaksinave. është që në programin e tyre e kanë pasur që do të bashkëpunojë me Shqipërinë për të siguruar vaksinat, e Kurti refuzoi ndihmën për vaksina nga Shqipëria. Shpresojmë që në këtë debat të vije edhe kryeministri edhe ministri. Çështje tjetër është organizimi i mësimit në rrethana të pandemisë. E dimë që viti 2020 ka qenë i humbur sa i përket arsimit, e nuk mund të lejojmë që edhe viti 2021 të shkojë i humbur. Debati i tretë, është që ndërlidhet me situatën ekonomike. Ende nuk kemi kurrfarë qartësie sa i përket implementimit të masave të pakos fiskale as cila do të jetë qasja e kësaj qeverie për të ndikuar bizneset”, tha ai./KP