Vjosa presidente, Abdixhiku: LDK do të vazhdojë rolin opozitar përballë pushtetit absolut

- in Lajme

Kryetari i Lidhjes Demokratike të Kosovës (LDK), Lumir Abdixhiku, ka uruar Vjosa Osmanin me rastin e zgjedhjes për presidente.

Ai pas zgjedhjes së shefes së ri të shtetit, ka thënë se LDK-ja do të vazhdojë të luajë rolin e saj si parti opozitare në Kuvendin e Kosovës.

“LDK ashtu siç ishte zotuar ishte konstruktive. Tani kemi një presidente dhe i urojmë shëndet dhe shpresojmë që e njëjta do t’i përfaqësojë qytetarët, dhe kështu të lë një shenjë të mirë për pesë vjetët e ardhshme. LDK do të vazhdojë rolin e saj opozitar përballë pushtetit absolut”, tha Abdixhiku.

Gruaja më e votuar në zgjedhjet e fundit parlamentare Vjosa Osmani nga Lista Guxo, pjesë e Lëvizjes Vetëvendosje në Kuvend, është zgjedhur shefe e re e shtetit të Kosovës.

Ajo sot në raundin e tretë të votimit për president në Kuvend, ku morën pjesë 82 deputetë, ka marrë 71 vota.

Ndryshe, që prej 5 nëntorit 2020, Kosova është me ushtrues detyre të presidentit, pasi Hashim Thaçi ka dhënë dorëheqje, pas konfirmimit të aktakuzës nga Dhomat e Specializuara në Hagë.

Vjosa Osmani në zgjedhjet e 14 shkurtit mori mbi 300 mijë vota, duke u bërë kështu personi më i votuar në Kosovën e pasluftës./Sh.Pajaziti/KP