Manchester City ka tërhequr interesin për super yllin e Barcelonës Lionel Messi, sipas një raporti nga “Eurosport”.
Verën e kaluar, Messi ishte në zemër të një prej historive më të mëdha të afatit kalimtar. Argjentinasi paraqiti një kërkesë largimi nga Barcelona, pasi kishte luajtur për klubin që kur ishte 13 vjeçar.
Kjo e bëri që mediat ta lidhnin atë me çdo klub të madh në Evropë që lidhej me nënshkrimin e tij. Sidoqoftë, pas një mosmarrëveshje me ish-presidentin Josep Maria Bartomeu, 33-vjeçari mbeti në “Camp Nou”.
Gjatë gjithë sezonit, thashethemet kanë vazhduar të përhapen. Man City dhe Paris Saint-Germain janë përfolur vazhdimisht si destinacioni i ardhshëm i Messit pas skadimit të kontratës së tij në verë, përcjellë KosovaPress.
Sidoqoftë, “Eurosport” po pretendon që City ka tërhequr çdo interesim të mundshëm, pasi ata besojnë se ai do të nënshkruajë një marrëveshje të re me Barcelonën.
Që nga saga e transferimit të verës së kaluar, Bartomeu ka dhënë dorëheqjen nga pozita e tij dhe është zëvendësuar nga i shumë popullarizuari Joan Laporta.
Spanjolli, i cili ishte më parë në krye të klubit gjatë ditëve të para të Messit në “La Blaugrana”, u zotua të mbante gjashtë herë fituesin e Topit të Artë në klub.
Për më tepër, performancat dhe rezultatet kanë filluar të duken shumë më inkurajuese. Ata arritën në finalen e Copa del Rey pas një rikthimi fenomenal të ndeshjes së dytë kundër Sevillas.
Barça gjithashtu ka mbyllur hendekun me Atletico Madridin në La Liga në vetëm katër pikë./KP