Kandidati i Lidhjes Demokratike të Kosovës për kryetar të kësaj partie, Lutfi Haziri ka thënë se për këtë pozitë nuk po garon me rival politik por me bashkëpunëtorë. Derisa shpalli kandidaturën sot, Haziri ka thënë nuk pajtohet që të bëhet tifo për asnjërin nga kandidatët brenda partisë. Kur është pyetur rreth deklaratës së bashkëpartiakut të tij, kryetarit të Komunës së Vushtrrisë, Xhafer Tahiri i cili dje deklaroi për KosovaPress se si degë e mbështesin Lumir Abdixhikun për kryetar, Haziri ka thënë se “në LDK thuhet me kënd bëhet Xhafa humb ai”.
Kryetari i Gjilanit, Lutfi Haziri ka thënë që është e rëndësishme që delegatët e LDK-së të votojnë lirshëm dhe sipas tij, LDK nuk e pranon logjikën e ndarjes së brendshme.
Haziri: Në LDK thuhet që me kënd bëhet Xhafa humb ai
(Video)
“Ajo që një koleg i imi ka dalë për shembull dje me tifozllëk me mbështetë është pjesë e vendimit të tij, e vlerësoj, por ajo që thuhet në LDK ‘me kënd bëhet Xhafa humb ai’ është e vërtetë. Nuk e kam problem, nuk e pranoj tifozllëkun, nuk lejoj me pas tifozllëk sepse nuk jemi në asnjë garë sportive apo garë tjetër, ky është aktivitet normal i brendshëm ne të cilin ne njihemi mes vete dhe secili mund lirë të votojë”, ka thënë Haziri.
Haziri tha se do të pranojë çdo rezultat që do të dalë nga zgjedhjet e së dielës në LDK dhe do të përkrah kryetarin e zgjedhur të partisë.
Haziri: Për kryetar të LDK nuk po garoj me rivalë politikë
(Video)
“Nuk jam duke garuar me rival politik, kandidaturat e mija personale karshi rivalëve politikë i kam fituar që 30 vjet, por brenda familjes politike nuk shoh rival dhe nuk i trajtoj si rival, i kam kolegë. Rezultati që del prej kutisë për mua është i pranueshëm, dhe ka me pas mbështetjen time të padiskutueshme, çdo kush”, ka shtuar ai.
Kryetari i Komunës së Vushtrrisë, Xhafer Tahiri dje në një intervistë për KosovaPress ka thënë se dega e LDK-së në këtë komunë e përkrah Lumir Abdixhikun për kryetar të kësaj partie.
Tahiri: Dega e LDK-së në Vushtrri dhe unë do e përkrahim Abdixhikun për kryetar
Video
“Nga kandidatura që kemi parë tani të zotëri Lufti Hazirit dhe zotëri Lumir Abdixhikut por besoj që është e qartë që dega jonë në bazë të asaj që thash dhe deklarova dhe takimeve që kemi mbajtur dhe personalisht do përkrahim kandidaturën e Lumir Abdixhikut për kryetar të LDK-së”, ka thënë Tahiri për KosovaPress.
Këtë të diele, më 14 mars do të mbahen zgjedhjet e brendshme në Lidhjen Demokratike të Kosovës ku mbi 300 delegatë të kësaj partie do të zgjedhin kryetarin.
Zgjedhjet po mbahen pasi kryetari i deritanishëm, Isa Mustafa dha dorëheqje nga kjo pozitë pasi më 14 shkurt LDK pësoi humbjen më të rëndë në historinë e zgjedhjeve nacionale./G.Kadrija/KosovaPress