Presidentja Vjosa Osmani-Sadriu dhe bashkëshorti i saj, Prindon Sadriu, duket se janë në pritje të një jete perfekte, në të cilën përfshihen një banesë në një lagje luksoze dhe një parcelë toke në një tjetër lagje luksoze, e quajtur “Lagjja e Gjelbër”.
Në deklarimet e pasurisë që kanë bërë çifti presidencial për vitin 2022, del se ata tashmë e kanë zgjedhur problemin e banimit pasi kanë kontraktuar dy vendbanime goxha luksoze, por që duhet pritur për t’u vendosur aty. Kësisoj, çifti përpos banesës në lagjen Marigona Hill që kushton fiks 87 mijë e 900 euro, Osmani-Sadriu kanë blerë edhe një parcelë toke në një lagje tjetër që quhet “Lagjja e Gjelbër” në Kolovicë, që është ngjitur me Parkun e Gërmisë. Për këtë parcelë që është 4 ari, deri më tani ata kanë paguar 10 mijë euro. Por, se cila është vlera e saktë e parcelës, nuk është bërë publike.
Sipas përshkrimit që Prindon Sadriu i ka bërë parcelës së tokës, thuhet se parcela “është kontraktuar, por nuk është ende në pronësi e as shfrytëzim”.
“Banim në varg (e kontraktuar, por nuk ka kaluar ende në pronësi të deklaruesit dhe nuk ka vlerë reale, në ndërtim të vrazhdë)”, thuhet në deklarimin e pasurisë së Prindon Sadriut.
Teksa të dyja vendbanimet e reja thuhet se i kanë marrë borxh, në banka ata kanë të ruajtuara fiks 66 mijë e 844 euro.
Ndërsa vetë Sadriu ka deklaruar edhe dy shtëpi dhe një banesë tjetër në vlerë prej mbi 300 mijë eurove. I bie që çifti presidencial ka 2 shtëpi, 2 banesa dhe 2 parcela toke, në të cilat është duke u bërë ndërtim, edhe pse tash i vrazhdë. /Nacionale