Vjedhjet e çantave të dorës e kuletave ndodhin shumë shpesh në vendin tonë, qoftë në rrugë apo restorante e lokale të ndryshme. Në shumicën e rasteve, hajnat arrijnë të ikin dhe të shpëtojnë nga prangat e Policisë. Një rast i tillë i vjedhjes ka ndodhur edhe mbrëmë në Prishtinë, por këtë herë një vajzë e mitur që ishte cak, arriti ta kap hajnin, raporton Gazeta Sinjali.
Burimet nga Prokuroria kanë bërë me dije se ngjarja ka ndodhur në rrugën “Xhorxh Bush”, kur një person me inicialet F.H., dyshohet se ia vodhi një 17-vjeçares kuletën dhe tentoi të zhduket. Plani i tij siç duket shkoi huq, pasi e mitura e kuptoi dhe menjëherë njoftoi Policinë.
Si rezultat i denoncimit, njësia policore doli në vendin e ngjarjes, ku edhe u arrestua personi i dyshuar, i cili është shoqëruar në stacion policor për të dhënë deklaratë në lidhje me rastin.
Pas intervistimit të të dy palëve, Prokurori i Shtetit ka nxjerrë aktvendim për ndalim prej 48 orësh të të dyshuarit dhe inicimin e rastit ndaj tij si “vjedhje”.