Kryetari i Lidhjes Demokratike të Kosovës (LDK), Lumir Abdixhiku, ka folur rreth asaj nëse do të përjashtohet nga partia Agim Veliu në rast se ky i fundit nuk do të qëndrojë në sallë në momentin e votimit të Vjosa Osmanit presidente.
Ai në Debat Plus të TV Dukagjinit ka thënë se “nuk kemi njerëz për të humbur e për të përjashtuar”.
“Qëndrimet e brendshme i mbajmë brenda familjes tonë. Nuk është hera e parë që ka pasur vendim të kryesisë e nuk është respektuar nga deputetët. Nuk e di kur është koha që të përfundojë kjo. Nuk kemi njerëz për të humbur e për të përjashtuar. Jemi të pakët në numër këtë herë dhe në këtë vijë do të duhej të ishim të bashkuar”, ka thënë Abdixhiku.
Ndryshe, Abdixhiku i cili mori udhëheqjen e partisë pas dorëheqjes së Isa Mustafës për shkak të humbjes në zgjedhjet e 14 shkurtit, tha sot më herët se kanë vendosur që LDK të merr pjesë në votimin e presidentit, në këtë rast të Vjosa Osmanit./KP