Gjykata Kushtetuese ka vendosur të ndërpritet procedura e shqyrtimit të kërkesës së Lëvizjes Vetëvendosje për vizitën e ish-presidentit Hashim Thaçi në shtëpinë e deputetit Haxhi Shalës.
Parashtrues të kërkesë ishin Fitore Pacolli dhe 29 deputetë të tjerë të Kuvendit të Republikës së Kosovës mbi vlerësimin e kushtetutshmërisë së vizitës së presidentit të Kosovës më 3 qershor 2020 në shtëpinë/banesën private të deputetit të Kuvendit të Kosovës.
Në kërkesën e tyre, parashtruesit pretendonin që duke përdorur mekanizma jo kushtetues, se presidenti ka kryer shkelje serioze të Kushtetutës, në veçanti të nenit 83 [statusi i presidentit], të nenit 84 [Kompetencat e presidentit], paragrafi 2 në lidhje me paragrafin 14, të nenit 4 [Forma e qeverisjes dhe ndarja e pushtetit] në lidhje me paragrafin 3, të nenit 7 [vlerat], të nenit 65 [Kompetenca e Kuvendit], paragrafi 8, dhe të nenit 16 [Epërsia e Kushtetutës] të Kushtetutës së Republikës. Parashtruesit gjithashtu kërkuan që Gjykata të mbajë një seancë dëgjimore publike përkitazi me këtë rast.
Kërkesa bazohej në paragrafin 6 të nenit 113 [Juridiksioni dhe Palët e Autorizuara], të Kushtetutës, në nenet 22 [Procedimi i kërkesës], 44 [Saktësimi i kërkesës] dhe 45 [Afatet] të Ligjit nr. 03/L-121 për Gjykatën Kushtetuese, dhe në rregullat 32 [Parashtrimi i kërkesave dhe përgjigjeve] dhe 75 [Kërkesa në pajtim me nenin 113.6 të Kushtetutës dhe me nenet 44 dhe 45 të Ligjit] të Rregullores së punës së Gjykatës Kushtetuese.
Kolegji shqyrtues propozoi që, në pajtim me paragrafin 6 të nenit 113 të Kushtetutës, me nenet 44 dhe 45 të Ligjit për Gjykatën Kushtetuese dhe me rregullat 59 dhe 75.5 të Rregullores së punës, të ndërpritet procedura e shqyrtimit të kërkesës së parashtruesve.
Ndryshe, vota e Haxhi Shalës ishte e ‘artë’ për krijimin e Qeverisë Hoti vitin ekaluar. Vetë Shala një ditë para seancës kishte deklaruar se nuk ka votë për qeverinë Hoti, por mendjen e ndërroi pak pas mesnatës së 3 qershorit, pasi që Hashim Thaçi dhe ish-kryeministri Ramush Haradinaj, i kishin shkruar bashkë në shtëpi.
Kjo shkaktoi reagimin e Lëvizjes Vetëvendosje duke dërguar kërkesën për vlefshmërinë e këtij veprimi në Gjykatën Kushtetuese./KosovaPress