Kryeministri i Kosovës, Albin Kurti deklaroi se në institucionet e Ballkanit Perëndimor ka kriminelë të luftës dhe të paqes. Deklaratë kjo që Kurti e bëri pas darkës që kishte me liderët e rajonit të Ballkanit Perëndimore në Bruksel këtë të martë.
Ndaj kësaj deklarate ka reaguar shefi i Grupit Parlamentar të Partisë Demokratike të Kosovës (PDK), Abelard Tahiri, duke e pyetur “Ai sot duhet të tregojë me emër e mbiemër, kush qenkan kriminelët e luftës në mesin tonë, që i dashka jashtë institucioneve?”. Madje nënvizon se Kurti duhet të japë llogari për siç tha ai darkë turpi.
Tahiri në shkrimin e tij në “facebook” ka thënë se e gjithë bota e di se Serbia ka kryer krime në përmasa të gjenocidit në Kosovë edhe në Bosnje por që thotë se për Kurtin kriminelët e luftës nuk qenkan me adresë vetëm në Serbi.
“E gjithë bota e di se Serbia ka kryer krime në përmasa të gjenocidit edhe në Kosovë edhe në Bosnje, por për kryeministrin tonë, kriminelët e luftës nuk qenkan me adresë në Serbi. Ata qenkan të shpërndarë gjithandej në vendet e Ballkanit Perëndimor, aty ku bëjmë pjesë edhe ne. Ndonëse adresa e krimit dihet, sipas logjikës së kryeministrit Kurti i bie që përgjegjësia qenka e të gjithëve, edhe e jona. Historinë e rrejshme që Serbia po përpiqet ta instalojë si të vërtetë bashkë me argatët e saj, Kurti mbrëmë e legjitimoi si të tillë, duke mos guxuar ta thotë hapur se krime ka bërë Serbia dhe kriminelët gjenden në Serbi, e jo në Ballkanin Perëndimor si tërësi. Ne një herë jemi çliruar nga kriminelët, me 1999, atëherë kur Kosova u çlirua nga kryekrimineli Millosheviç. Të tjerë kriminelë që s’kanë dhënë llogari, i kemi kërkuar në Serbi, aty ku edhe gjenden. Por kryeministri do që t’i kërkojmë edhe në mesin tonë, sepse të tillë i do Serbia për veten e saj”, ka shkruar Tahiri.
Mes tjerash Tahiri thotë se kjo është një fatkeqësi meqë Kosova ka një kryeministër që për deficitetet e komplekset e veta politike është në gjendje sipas tij që heronjtë e saj t’i shndërroj në kriminelë potencialë.
“Kjo është fatkeqësia me të cilën përballemi sot, kur kemi një kryeministër që për deficitet e komplekset e veta politike është në gjendje që heronjtë tanë t’i shndërrojë në kriminelë potencialë.
Kështu na ka dashur edhe Serbia gjithmonë. Një vend që s’ka identitet dhe ku ata që i dalin asaj përballë, të njihen si kriminelë lufte, të mos gjenden as në institucione, as në jetën tonë politike e publike. Ai sot duhet të tregojë me emër e mbiemër, kush qenkan kriminelët e luftës në mesin tonë, që i dashka jashtë institucioneve? Duhet të japë llogari për këtë darkë turpi, ku në vend se të kërkonte llogari për 13 mijë civilë të vrarë dhe për 1650 të zhdukur, ai i përgjithësoi e i barazoi viktimat me kriminelët e vërtetë”, përfundon shkrimi i Tahirit. /KP