Kryetari i Komunës së Prishtinës, Shpend Ahmeti, ka thënë se në pjesën e parë të vitit 2021 do të finalizojë negocimet për blerjen e 30 autobusëve të ri urban për kryeqytetin.
Ai në një postim në Facebook ka shkruar përmes këtij investimi do të plotësohet zotimi elektoral i tij për 80 autobusë në pronësi publike.
“Në pjesën e parë të këtij viti do të finalizojmë negociatat për blerjen e 30 autobusëve të rinj me që rast do të kompletojmë zotimin për autobusët në pronësi publike (80). Tetë autobusë do të jenë elektrikë, sipas diskutimeve me BERZH. Po ashtu, në prill do të fillojë prokurimi për operatorët privat në linja të caktuara ku kontratat do të jenë afatgjata ndërsa do të kërkohet investimi në flotë”, ka shkruar Ahmeti.
Qeveria e Kosovës në qershor 2016 miratoi garancinë për kredi nga BERZH-i për blerjen e 51 autobusëve të ri për Komunën e Prishtinës, pas një debati të ashpër me Komunës së Prishtinës dhe Ministrisë së Financave, meqë Komuna fajësonte Ministrinë për neglizhencë të qëllimshme të këtij procesi.
Komuna e Prishtinës ka kontraktuar kompaninë çeke ‘Iveco’ për blerjen e 51 e autobusëve për ndërmarrjen publike “Trafiku Urban”, të cilët në rrugët e Prishtinës u vunë për herë të parë në qarkullim në fillim të vitit 2017.
Autobusët e ri dhe reformimi në përgjithësi i trafikut urban ka qenë një prej premtimeve kryesore të Shpend Ahmetit për Prishtinën./KosovaPress