Në 10 vjetorin e miratimit të Konventës së Stambollit kundër dhunës në familje dhe dhunës ndaj grave, zëvendësministrja e Drejtësisë Nita Shala, ka vizituar sot Policinë e Kosovës dhe Njësitin Kundër Dhunës në Familje.
Pas takimit zëvendësministrja e Drejtësisë, Nita Shala, tha se kanë pasur një takim shumë frytdhënës ku kanë diskutuar për të bashkërenduar aktivitetet në parandalimin e dhunës në familje dhe dhunës ndaj grave.
Shala: Si mund të bashkërendojmë aktivitetet në parandalimin si dhe përgjigjen ndaj rasteve të tilla
“Ndamë fillimisht shqetësimin për fenomenin e dhunës në familje, si dhe diskutuam hapat konkret që mund të ndërmarrim dhe si mund të bashkërendojmë aktivitetet qoftë në parandalimin si dhe përgjigjen ndaj rasteve të tilla”, tha ajo.
Ndërsa, drejtori i përgjithshëm i Policisë së Kosovës, Samedin Mehmeti, tha se kanë diskutuar se si të përmirësohet sistemi me qëllim që të fillimisht të parandalohet dhuna në familje.
Ai tha se është shumë më rëndësi që Policia si reagues i parë në rastet e dhunës në familje të reagojë në mënyrë profesionale.
Mehmeti: Policia si reagues i parë në rastet e dhunës në familje të reagojë në mënyrë profesionale
“Si duhet ta përmirësojmë sistemin me qëllim që fillimisht ta parandalojmë dhunën në familje, po edhe në raste të cilat ndodh dhuna në familje mënyrën e reagimit. Natyrisht fokusi ishte tek Policia dhe fokusi tek reagimi i Policisë, për çka ne diskutuam çështje konkrete me zëvendësministren dhe përkushtohemi dhe i thamë edhe zëvendësministres gjithashtu po e ndajmë me publikun se ne kemi bërë disa ndryshime tek sektori i dhunës në familje, disa ndryshime të çështjeve procedurale dhe çështjeve operacionale si t’i trajtojmë dhe t’i identifikojmë aty ku i kemi pengesat ose aty ku i kemi problemet në natyrën e përkushtimit dhe natyrën e punës së Policisë. Ajo çka është shumë më rëndësi është që Policia si reagues i parë në rastet e dhunës në familje të reagojë në mënyrë profesionale dhe qasja të jetë e atillë që viktimat të mos riviktimizohet, por që viktima vërtetë të trajtohet në mënyrë profesionale, ndërsa aspekti tjetër ligjor të respektohet dhe të respektohen të gjithë procedurat e parapara rreth kësaj çështje”, tha ai.
Në këtë përvjetor, ministrja e Drejtësisë Albulena Haxhiu dhe zëvendësministrja e Drejtësisë Nita Shala, kanë takuar edhe mbrojtësit e viktimave dhe Qendrën për Mbrojtjen e Grave dhe Fëmijëve./KP
