Profesori amerikan në Universitetin Johns Hopkins dhe eksperti për Ballkanin, Daniel Serwer ka deklaruar se pavarësisht që administrata amerikane e presidentit Joe Biden e ka marrë më seriozisht punën e dialogut, ai nuk pret njohje në një të ardhme të afërt.
Ai tha për TV Dukagjini se nuk beson se mund të arrihet shumë përtej një marrëveshjeje për t’u takuar në qershor.
“Mendoj se administrata e Biden është shumë më e përkushtuar në njohje e pavarësisë dhe sovranitetit të Kosovës brenda kufijve të saj aktual, por dyshoj se kjo do të ndodhë së shpejti. Më së miri të pyesni Lajçak dhe Palmer. Disa marrëveshje të reja për gjëra të tilla si njerëz të zhdukur dhe financa janë të mundshme, por unë dyshoj se do të ketë një marrëveshje për njohjen”, tha ai.
Ndryshe, emisari special i SHBA-së për Ballkanin Perëndimor, Mathew Palmer deklaroi gjatë vizitës në Kosovë se rruga më e mirë në fund të dialogut do të ishte njohja nga Serbia. Por, kjo nuk u dëgjua edhe nga emisari i BE-së, Miroslav Lajçak i cili tha se qëllimi i dialogut është normalizimi i raporteve mes palëve./KP