Se rusët nuk kanë qenë të dashur historikisht në territorin e Kosovës dhe se historikisht kanë punuar kundër interesave shqiptare, e dëshmon edhe rasti i vrasjes së konsullit rus Grigory Stepanovich Schterbina, në vitin 1903 në Mitrovicë nga Halit (Ibrahim) Popofci.
Në ditën e diplomacisë ruse, studentët e Departamentit të Gjuhës Ruse të Fakultetit të Filozofisë në Mitrovicën Veriore, kanë përkujtuar dhe vendosur kurora lule te statuja e Schterbinas në veri të Mitrovicës.
Pasi ishte emëruar konsull në Mitrovicë në fund të vitit 1902, Schterbina ishte qëlluar për vdekje nga Popofci, me urdhër të Isa Boletinit.
Halit (Ibrahim) Popofci ishte shqiptar nga Selishta, më saktësisht nga Suka dhe njëkohësisht ishte dhjetar i togës së Taborit të Katërt të Regjimentit 17 të ushtrisë së rregullt osmane në Mitrovicë.
Në vitin 1902, Grigoriy Stepanovich Schterbina, emërohet konsull rus në Mitrovicë dhe njihej për prirjet e tij antishqiptare. Meqë emërimi i tij shkaktoi zemërim të madh te shqiptarët e asaj kohe, ai do të merrej në mbrojtje nga garnizoni osman i Mitrovicës. Burimet historike të kohës dëshmojnë se Schterbina së bashku me trupat osmane, kishin shtypur me gjak protestat e revoltat e shqiptarëve të kohës.
Më 31 mars 1903, Haliti do të bënte atentat ndaj konsullit rus ku e godet me dy plumba. Njëri plumb e plagos lehtë konsullin në shpatull, kurse plumbi i dytë e godet ushtarin që e shoqëronte Schterbinan. Edhe pse u mendua që plaga nuk ishte serioze, më 10 prill 1903, në moshën 35-vjeçare, konsulli vdes.
Pothuajse nuk kishte asnjë gazetë në Evropë që në atë kohë që nuk kishte shkruar në faqen e parë për vrasjen e konsullit rus, vdekja e të cilit shkaktoi krizë në raportet ndërmjet Turqisë dhe Rusisë./KosovaPress