Qeveria në detyrë në mbledhjen e sotme online ka miratuar katër vendime për zbatimin e Programit të Rimëkëmbjes Ekonomike.
Vendimi i parë ka të bëjë me ndarjen e 1 milionë e 500 mijë euro për mbulimin e kostos së tarifës së Fondit për Garanci Kreditore, mjete këto të cilat janë marrë nga Programi i Rimëkëmbjes Ekonomike.
Qeveria ka vendosur lirimin për studentë nga pagesa e shkollimit për regjistrimin e semestrit veror në vitin akademik 2020-2021. Lirim të plotë nga pagesa e tarifës për regjistrimin e semestrit veror të viti akademik 2020/21 do të ketë për studentët e nivelit bachelor në institucionet publike të arsimit të lartë, të cilët nuk kanë qenë përfitues nga skemat ekzistuese për lirim deri në hyrjen në fuqi të këtij vendimi. 50% lirim nga pagesa e tarifës për semestrin veror të viti akademik 2020/21 për studentët e nivelit master, që nuk kanë qenë përfitues nga lirimi sipas skemave ekzistuese.
Përfitues të këtyre lirimeve do të jenë edhe studentët nga Lugina e Preshevës dhe nga Mali i Zi, të cilët studiojnë në institucionet publike të arsimit të lartë në Kosovë.
Për zbatim të këtij vendimi janë ndarë 3 milionë e 232 mijë euro, të cilat do të merren nga Programi i Rimëkëmbjes Ekonomike dhe do të transferohen te Thesari në kategorinë e shpenzimeve të subvencioneve dhe transfereve.
Qeveria ka bërë ndryshim-plotësimin e vendimit të datës 14.01.2021, me të cilin ndryshim pika 1.14, Masa 14, riformulohet duke përcaktuar se në Ministrinë e Ekonomisë dhe Ambientit, në nën programin Ndërmarrësia, do të ndahen 8 milionë euro për subvencionimin e burimeve të ripërtërira të energjisë.
Ndërsa pas pikës 1.16 shtohet si pikë 1.17, masa e 17, sipas të cilës mjetet me vlerë prej 8 milionë eurove nga pika 1.14 do të mbeten të paalokuara te Programi i Rimëkëmbjes Ekonomike dhe do të ndahen sipas nevojës për mbulimin e kërkesave të natyrës së pandemisë dhe rimëkëmbjes ekonomike.
Vendimi i katërt i aprovuar ka të bëjë me ndryshim-plotësimin e vendimit të Qeverisë të datës 09.02.2021, me të cilin sqarohet se mjetet për ndarjen e mjeteve për Shoqatën e Invalidëve të Luftës së UÇK-së për mbulimin e shpenzimeve për nevojat emergjente për protezat e invalidëve të UÇK-së, do të sigurohen nga nën programi i shpenzimeve të paparashikuara në kategorinë e Rezervës dhe të njëjtat transferohen të nën programi për invalidët e luftës – kategoria e shpenzimeve dhe transfereve dhe nga aty te Shoqata e Invalidëve të Luftës së UÇK-së./KosovaPress