Vjosa Osmani zyrtarisht është zgjedhur presidente e Republikës së Kosovës. Në raundin e tretë, kanë marrë pjesë 82 deputetë, ku Vjosa Osmani Osmani ka arritur të marrë 71 vota, kundërkandidati i saj Nasuf Bejta asnjë votë dhe 11 vota të pavlefshme.
Në raundin e parë, që në votim kanë marrë pjesë 81 deputetë, 69 vota ishin për Vjosa Osmani, asnjë votë për kandidatin Nasuf Bejta dhe 12 vota të pavlefshme.
Ndërsa, në raundin e dytë kanë marrë pjesë 82 deputetë në votim, ku 67 vota ishin për Vjosa Osmanin, 4 vota për Nasuf Bejta dhe 11 vota të pavlefshme.
Seanca për zgjedhjen e presidentit të Kosovës ka nisur ditën e djeshme, por që për shkak të mungesës së kuorumit dy herë është përsëritur raundi i parë i votimit. Në votimin e parë kanë marrë pjesë 78 deputetë, ndërsa në të dytin 79. Sikurse sot, edhe gjatë ditës së djeshme në votim nuk kanë marrë pjesë tre deputetët e LDK-së, Avdullah Hoti, Agim Veliu e Driton Selmanaj.
Sot në votim kanë marrë pjesë edhe deputetët nga pakicat jo serbe Adem Hoxha dhe Fadil Gashi, e që të dy dje nuk kishin marrë pjesë në seancë. Në votim ka marrë pjesë edhe deputetja e PDK-së Adelina Grainca, e cila nuk kishte marrë pjesë në votimin e parë. /KP