Partia Demokratike e Kosovës (PDK) ka kritikuar Qeverinë Kurti për, siç thanë ata, ikje nga përgjegjësia për çështjet urgjente që i ka Kosova. Sipas PDK-së, Kryeministri i Kosovës, Albin Kurti nuk po merret me pandeminë dhe dëmet ekonomike por po merr pjesë në fushatë zgjedhore në Shqipëri. Shefi i Grupit Parlamentar të PDK-së, Abelard Tahiri, përmes një konference për media, i ka bërë thirrje Kurtit që të tërhiqet nga fushata zgjedhore në Shqipëri, derisa ka bërë të ditur se do të thirrin edhe seancë të jashtëzakonshme për, siç tha ai, të thirrur në përgjegjësi shefin e ekzekutivit për masat dhe çështjet që lidhen me pandeminë.
Tahiri ka kritikuar pushtetin për veprimet e tyre gjatë fundjavës, meqë të njëjtit kanë qëndruar në Shqipëri për të bërë fushatë për zgjedhjet e 25 prillit që do të mbahen atje.
Madje sipas tij, veprimet e Kurtit po dëmtojnë raportet në mes të dy shteteve.
Tahiri: I bëjmë thirrje Kurtit të tërhiqet nga fushata zgjedhore në Shqipëri
“E vetmja gjë që Kryeministri Kurti ka ndërmarrë deri më tash – ka qenë një urdhër për izolim për qytetarët e Kosovës, përderisa ministrat dhe deputetët e partisë së tij kanë çarë rrethimin dhe kanë dalë në Shqipëri për të bërë fushatë zgjedhore…Ne sot e kemi një kryeministër mjaft të papërgjegjshëm që e udhëheq Republikën e Kosovës dhe po e dëmton edhe raportet në mes të dyja vendeve që nuk ka ndodhur asnjëherë, dhe ne po i bëjmë thirrje që të tërhiqet nga kjo fushatë zgjedhore në Republikën e Shqipërisë sepse për 20 ditë me të ndërru jetë 212 qytetarë si rezultat i Covid-19 dhe mos me ndje përgjegjësinë, me i ikë përgjegjësisë, vërtetë është e papranueshme”, ka thënë ai.
Ai ka kritikuar ekzekutivin për mos sigurimin e dozave të reja të vaksinave anti-Covid.
Tahiri: Kurti nuk ka bërë asnjë hap për të siguruar vaksinat
“Kryeministri Kurti është vaksinuar vetë, dhe ai ndihet komod me faktin se i ka pranuar 25 mijë vaksina donacion, një ndihmë kjo e siguruar nga Qeveria e kaluar, por nuk ka bërë asnjë hap për të siguruar edhe qindra mijëra vaksina të tjera që u duhen më shumë se kurrë qytetarëve të Kosovës. Ai është vaksinuar vetë, por ka refuzuar ndihmën e Shqipërisë për të siguruar edhe një numër të konsiderueshëm vaksinash për qytetarët, ndërsa nuk ka treguar se prej ku i pret ndihmat e as vaksinat”, ka thënë Tahiri.
Shefi i deputetëve të PDK-së ka thënë se Kurti deri tani nuk ka ndërmarrë asnjë hap rreth përmirësimit të gjendjes ekonomike të dëmtuar si pasojë e pandemisë duke shtuar se qeveria nuk ka sqaruar se kur dhe si do të ofrohet mbështetje për bizneset.
Tahiri ka thënë se do të koordinohen me partitë e tjera opozitare rreth një seance parlamentare që sipas tij është e domosdoshme për të diskutuar për masat anti-covid./KP