Deputeti i Grupit Parlamentar të LDK-së, Behgjet Pacolli ka mohuar se ka pasur shkëmbim të letrave me deputetët e Lidhjes Demokratike të Kosovës për votimin e presidentit.
Ai para gazetarëve ka treguar biletën e aeroplanit, ndërkohë që ka bërë të ditur se ka votuar për zgjedhjen e presidentit, por nuk ka treguar nëse ka votuar pro Vjosa Osmanit.
Pacolli: Vota është e fshehtë
(Video)
“Vota është e fshehtë… unë kam marrë pjesë në votim. Vota është e fshehtë dhe çdo deputet është i përgjegjshëm për votën e tij. Unë mund t’ju them se kam kryer obligim me shumë përgjegjësi. Jam kthyer prej rrugës për të qenë në këtë moment të rëndësishëm”, tha ai.
Pacolli nuk ka pohuar se ka votuar pro zgjedhjes së presidentes, Vjosa Osmani.
Pacolli: Ku e dini ju çka kam votuar unë?
Video
“Ku e dini ju çka kam votuar unë? Përgjigjja është që unë kam votuar dhe sipas përgjegjësisë time kam kryer obligimin si deputet”, ka shtuar ai.
Ndryshe, në seancën e Kuvendit të Kosovës ka dështuar dy votimet e para të votimit të raundit të parë për president ku në garë janë Vjosa Osmani dhe Nasuf Bejta, për shkak se në votim kanë marrë pjesë 79 deputetë, një më pak se numri i nevojshëm për kuorum. Kryetari i Kuvendit, Glauk Konjufca ka thënë pas përfundimit të votimit të dytë se nevojitet një konsultë e shkurtër para shkuarjes në votimin e tretë të raundit të parë.
Kujtojmë që një pjesë e deputetëve të LDK-së, Avdullah Hoti, Agim Veliu dhe Driton Selmanaj nuk kanë marrë pjesë fare në votim, ndërkohë që ka votuar Albena Reshitaj e AAK-së, si deputetja e vetme nga kjo parti, e cila më herët kishte vendosur që të mos merr pjesë në zgjedhjen e presidentit.
Në seancën për zgjedhjen e presidentit nuk po marrin pjesë as deputetët e Partisë Demokratike të Kosovës dhe Listës Serbe. /Sh.Pajaziti/KP