Presidentja e Kosovës, Vjosa Osmani u është adresuar ushtarëve të Forcës së Sigurisë së Kosovës të cilat janë pjesë e ushtrimit amerikan “Defender Europe 21”. Në kampin e FSK-së në Deve të Gjakovës, Osmani ka thënë se gatishmëria e Kosovës për të thelluar partneritetin strategjik me aleatët perëndimor është e paluajtshme.
Komandantja supreme ka thënë se me suksesin e tyre në këtë ushtrim, pjesëtarët e FSK-së po e jetësojnë ëndrrën e secilit ushtarak dhe qytetar të Kosovës.
Osmani: Duke i mbrojtur shtëpitë tona, ne kemi mbrojtur vlerat e lirisë universale
“Të dashur oficer të forcave tona të armatosura, të dashur ushtarak, 22 vjet më parë gra e burra dinjitar të Kosovës, të udhëhequr nga ideali për lirinë u rreshtuan nën emblemën e Ushtrisë Çlirimtare të Kosovës, dhe e dëshmuan këmbënguljen tonë për ta fituar lirinë. Ata u përballëm me egërsinë e një regjimi edhe kur nuk kishin burime të mjaftueshme siç kemi tani, por ata e patën guximin dhe vendosmërinë për të qëndruar fort në kauzën e lirisë. Mbi të gjitha ata patën fatin të vepronin nën flamurin e një aleance të fuqishme me perëndimin të krijuar ndër vite me urti e durim. Në atë kohë sikurse sot ne e kemi ditur se duke i mbrojtur shtëpitë tona, duke luftuar për lirinë tonë ne i kemi mbrojtur vlerat e lirisë universale dhe kemi dhënë kontribut për mbrojtjen e tyre. Sot, 22 vjet pas ne bijat e bijtë e tyre të veshur me idealin e sigurimit të paqes e stabilitetit për vetën e për të tjerët i kemi lidhur qëllimet tina me përkushtimin e partneritetit tonë strategjik me ShBA-të, për të siguruar lirinë dhe për ta garantuar atë”, ka thënë Osmani.
Osmani ka thënë se ngritja e kapaciteteve si pjesë e planit gjithëpërfshirës të FSK-së, sot po e merr vulën e përkrahjes nga partnerët tanë strategjik.
Adresimi i presidentes para qindra ushtarëve të FSK-së u bë pasi ajo pa nga afër operacionet që po zhvillohen në kuadër të stërvitjes “Defender Europe 21” që në Kosovë kanë filluar më 17 maj dhe sot e ka pasur ditën kryesore.
Bashkë me të ishte edhe kryeministri Albin Kurti, i cili ushtarëve u premtoi përkrahje e rritje të buxhetit për ushtrinë.
Ai ka thënë se FSK është fisnikëri e Kosovës dhe mishërim i së kaluarës së dhimbshme e të lavdishme, i se tashmes sfiduese dhe së ardhmes prosperuese.
Kurti: Ju siguroj për mbështetjen, populli ynë e don paqen
“Jam i bindur që pas këtij ushtrimi Forca e Sigurisë së Kosovës ka fituar aftësi të reja ushtarake dhe edhe njëherë ju përgëzoj për arritjet dhe ju siguroj që kabineti im qeveritar do të vazhdojë mbështetjen e do ta shtojë buxhetin për Forcën e Sigurisë së Kosovës në rrugën e saj për arritjen e kapaciteteve të plota operacionale. Populli ynë e don dhe e mirëpret paqen, shteti yen është faktor dhe kontribuues i paqes”, ka thënë Kurti./G.Kadrija/KP