Presidentja e Republikës së Kosovës, Vjosa Osmani – Sadriu, Kryetari i Kuvendit të Kosovës, Glauk Konjufca, dhe Kryeministri Albin Kurti në paraditen e së dielës kanë bërë homazhe në varrezat e dëshmorëve në kryeqytet.
Nga aty u kujtua trimëria dhe sakrifica e dëshmorëve, ku edhe u theksua se të rënët për liri do të kujtohen dhe respektohen përherë. Krerëve institucional iu kërkua nga familjarët që gjatë qeverisjes të rregullojnë varret e gjithsecilit dëshmor.
Pas homazheve Osmani është shprehur falë sakrificës sublime të dëshmorëve populli shqiptarë gëzon lirinë. Ajo shtoi se në ditën e Dëshmorëve të Prishtinës duhet t’iu flitet gjeneratave të reja për trimërinë e dëshmorëve të cilët ranë për të mbrojtur Kosovën.
Osmani tha edhe se udhërrëfyesi më i ndritshëm për secilin është rruga që e kanë ndërtuar dëshmorët që ranë për atdhe.
Osmani: Në këtë ditë duhet t’iu flasim brezave të rinj për trimërinë e dëshmorëve të Kosovës
“Sot është dita e Dëshmorëve të Prishtinës, është një prej ditëve kur të gjithë ne bëhemi bashkë për ta nderuar sakrificën sublime që secili nga dëshmorët e këtij rajoni e bënë në mënyrë që ne sot ta gëzojmë lirinë. Është po ashtu dita ku ne duhet t’iu flasim brezave të rinj dhe gjeneratave të reja për trimërinë e dëshmorëve të Kosovës, dëshmorëve të cilët si pjesë e luftës sonë çlirimtare si pjesë e UÇK-së kanë rënë duke e mbrojtur Kosovë, ranë duke treguar se sakrifica për lirin, sakrifica për atdhe është dashuria më sublime që mund ta ketë një njeri. Prandaj dhe sot përkujtojmë të gjithë ata duke ia përkujtuar gjithashtu vetvetes se udhërrëfyesi më i ndritshëm për secilin prej nesh është pikërisht rruga që e ka ndërtuar secili dëshmorë që ka rënë për atdhe”, tha Osmani.
Kryetari i Kuvendit të Kosovës, Glauk Konjufca tha se liria e popullit dhe pavarësia e Kosovës nuk do të ishte e mundur pa sakrificën e dëshmorëve. Ai tha edhe se pjesa më e lavdishme e historisë së re të Kosovës është lufta e Ushtrisë Çlirimtare të Kosovës.
Konjufca: Liria e popullit nuk do të ishte e mundur pa sakrificën e dëshmorëve tonë
“Sakrifica e tyre qëndron e palëkundur në themelet e shtetit tonë, pa sakrificën dhe rënien e dëshmorëve nuk do të ishte e mundur liria e popullit tonë e as shtetësia e pavarësia e vendit tonë., kështu se sa të ketë gjallë komb shqiptar ata do të nderohen e respektohen gjithmonë. Mendoj që pjesa më e lavdishme e historisë së re të Kosovës dhe kombit tonë është lufta jonë çlirimtare, lufta e Ushtrisë Çlirimtare, rënia e mbi 2 mijë e 500 dëshmorëve, rënia e 14 mijë martirëve gjatë luftës së fundit në Kosovë”, është shprehur Konjufca.
Kryeministri i Kosovës, Albin Kurti para mediave tha se dëshmorët e kombit e bashkojnë popullin.
“Dëshmorët e kombit e bashkojnë popullin. Sot bashkë me presidenten e republikës dhe kryetarin e Kuvendit bëmë nderime tek varret e dëshmorëve të kryeqytetit të cilët luftuan për liri dhe ranë heroikisht që të ngritën edhe kauza jonë e më pas të vijnë edhe liria dhe pavarësia. Andaj ne kthehemi e rikthehemi në këto vende në mënyrë qe t’i kujtojmë ata dhe t’ia përkujtojmë vetes çmimin e madh që ka paguar populli ynë me gjakun e vet për lirinë dhe pavarësinë që e kemi sot. Por në të njëjtën për të përkujtuar amanetet dhe idealet e tyre që të vazhdojmë për progres, barazi dhe mirëqenie”, tha Kurti.
Krerëve institucional iu kërkua nga familjarët e dëshmorëve që të rregullojnë varret e të rënëve e të mos jenë vetëm premtime sikurse bënë qeveritë e shkuara.
Njëri nga familjarët, derisa i kërkoi Osmani, Konjufcës e Kurtit që të rregullojnë varrezat, theksoi edhe se kjo qeveri është e shpresës.
Familjari: Jeni qeveri e shpresës, besojmë që do t’i rregulloni varret e dëshmorëve
“Të vetmin që e kanë kryer obligimin janë dëshmorët dhe ia kemi borxh tanë jetën, disa varre janë ndreq e do jo. Qeveritë e deritashme na kanë premtuar dhe na kanë rrejt çdo ditë. Ua kujtoj disa fjalë që i keni thënë ‘ju edhe në tenderë të dëshmorëve vjedhin sepse jeni hajna klasik’. Disa varre janë të gurit e disa janë kështu[…]ju jeni qeveria e shpresës, qeveritë e deri tashme i kemi pa e qeverinë e juaj nuk e kemi parë. Po besojmë që keni me pas konsideratë dhe me qenë gjitha varret e njëjta sepse dëshmorët janë të njëjtë. Këta gur dikush i ka ndreq e dikush ka bërë hile. Këtu shoh edhe bagëti dhe lopë që po kullosin e ajo lopë që ka me kullosë këtu do ta hajë barin mbi varrin e vëllait tim dhe djalit tonë”, tha ai. /KP