Ushtruesja e detyrës së presidentes Vjosa Osmani priti sot në takim shefin e Zyrës së BE-së në Kosovë Tomas Szunyog, me të cilin ka biseduar për themelimin e institucioneve të reja pas zgjedhjeve të 14 shkurtit dhe bashkëpunimin me vendet anëtare të BE-së për sigurimin e vaksinës antiCOVID-19.
Me këtë rast, Szunyog e uroi Osmanin edhe njëherë me rastin e përvjetorit të Pavarësisë së Kosovës, si dhe e përgëzoi për rezultatin në zgjedhjet parlamentare.
Palët diskutuan për rëndësinë e madhe që ka themelimi sa më i shpejtë i institucioneve me qëllim të sigurimit të stabilitetit në vend. Po ashtu, të dy palët u dakorduan që kjo do të ndihmonte shumë edhe qasjen efektive në trajtimin serioz të situatës me pandeminë dhe angazhimin për ringritje ekonomike.
Në këtë drejtim, theks i veçantë gjatë takimit është vënë në sigurimin sa më të shpejtë të vaksinës. Me këtë rast, Osmani ritheksoi rëndësinë që ka bashkëpunimi sa më konkret me BE-në dhe vendet e saja anëtare për sigurimin e vaksinës në një kohë sa më të shkurtër.
Osmani falënderoi BE-në për rolin mbështetës në procesin e zgjedhjeve, si dhe theksoi se tash është e rëndësishme që të sigurohemi që të respektohet vullneti i qytetarëve. Ajo e siguroi Szunyog që orientimi zhvillimor do të jetë i fokusuar në investime në fusha si sundimi i ligjit, punësimi, shëndetësi, arsimi, mjedisi dhe digjitalizimi./KosovaPress