Pas mbledhjes së Kryesisë të AAK-së, anëtari i kësaj kryesie Muharrem Nitaj theksoi se kjo parti do të mbetet parti opozitare konstruktive.
Ai shtoi se temë e veçantë në mbledhjen e kryesisë ka qenë ajo për zgjedhjet komunale.
Nitaj: Kemi diskutuar për zgjedhjet komunale
Video
“Kemi diskutuar për procesin e krijimit të institucioneve të Kosovës dhe një temë e veçantë për zgjedhjet komunale. Nuk kam shumë çka për të deklaruar, ka deklaruar më parë edhe kryetari Haradinaj pas takimit. Qëndrimi i Aleancës mbetet që të jetë opozitë konstruktive për temat nacionale në përbërjen e re të qeverisë dhe besojmë që do të jemi konstruktivë në funksionimin si parti politike qoftë në Parlamentin e Kosovës ose në selinë e Aleancës për Ardhmërinë e Kosovës”, tha ai.
Ministri në detyrë i Ekonomisë, Nitaj tha po ashtu se zgjedhja e presidentit mbetet në diskrecionin e LVV-së si parti fituese e zgjedhjeve të 14 shkurtit.
Nitaj: Zgjedhja e presidentit mbetet në diskrecionin e VV-së
Video
“Besoj që keni pasur përgjigjen nga Haradinaj, fitues i këtyre zgjedhjeve është Lëvizja Vetëvendosje dhe iu takon atyre diskrecioni, fuqia dhe komoditeti që të gjejnë formulën për krijimin e institucioneve të Kosovës, natyrisht duke përfshirë edhe zgjedhjen e presidentit”, theksoi Nitaj.
Mbledhja e Kryesisë së AAK-së është mbajtur pas takimit që ka zhvilluar kryetari i kësaj partie Ramush Haradinaj me kandidatin për kryeministër Albin Kurti dhe kandidaten për presidente, Vjosa Osmani për konstituimin e institucioneve të dala nga zgjedhjet e 14 shkurtit. /I. Shabani/KosovaPress