Ka ndërruar jetë sot (e enjte) në Prishtinë, në moshë 64-vjeçare, gazetari Bedri Sadiku.
Lajmi u njoftua nga familja Sadiku që tha se ndërroi jetë i rrethuar nga familjarët e ngushtë, pas një sëmundje të shkurtër.
Bedri Sadiku u lind në Preshevë, ndërsa studimet i përfundoi në Fakultetin Filologjik në Shkup dhe studimet master në Zagreb të Kroacisë.
Për shumë vjet rresht punoi në gazetën Rilindja, fillimisht në Prishtinë, gjatë viteve 80-të, ndërsa më vonë gjatë viteve 90-të në Tiranë dhe Shkup.
Gjatë viteve të luftës në Kosovë përcolli për së afërmi krizën e refugjatëve në Maqedoni, teksa me intervistat e tij me ish ambasadorin amerikan Christopher Hill luajti një rol të rëndësishëm në sensibilizimin e çështjes së Kosovës.
Gjatë kohës së luftës Sadiku ka kontribuar shumë me Agjencinë e Lajmeve KosovaPress, duke raportuar për ngjarje për refugjatët dhe një pjesë për zonën e Nerodimes për të vazhduar bashkëpunim edhe pas çlirimit.
“Ishte kontributi i Bedri Sadikut që KosovaPress e filloi projektin për publikimin e lajmeve në gjuhën serbe dhe turke”, deklaroi Skënder Krasniqi nga KosovaPress.
Veterani i gazetarisë më vonë punoi edhe gazetat Lobi dhe Lajm ekskluzive. Ai përcolli nga afër luftërat në Preshevë dhe Maqedoni.
Sadiku bashkë me një plejadë gazetarësh të Rilindjes, llogariten si veprimtarë të rëndësishëm të çështjes kombëtare, gjatë viteve 90-të e tutje. Ai la të pikëlluar bashkëshorten Luljeten, dhe fëmijët Krenarin, Kushtrim, Shqipen dhe Besën.
Varrimi do të bëhet në varrezat e qytetit në Prishtinë Dragodan/Arbëri me Ikindi në ora 15:00.
“Për shkak të pandemisë, varrimi i të ndjerit, Bedri Sadiku, do të bëhet konform rregullave të IKSHP-së, andaj lusim të gjithë miqtë e dashamirët të ju përmbahen atyre, thuhet në njoftimin e familjes.
Agjencia e Lajmeve KosovaPress i shpreh ngushëllime familjes, miqve dhe ish-kolegëve./Blic & KosovaPress/KosovaPress