Ministrja e re e Arsimit nga radhët e Lëvizjes Vetëvendosje Arbërie Nagavci ka thënë se Qeveria Kurti 2 do t’ia kthejë dinjitetin Kosovës, duke e bërë një vend të mundësive dhe barazisë për të gjithë qytetarët e saj.
Ajo në një postim në Facebook ka falënderuar qytetarët për besimin e dhënë në zgjedhjet e 14 shkurtit, ndërsa ka uruar edhe kolegët e saj duke thënë se para tyre ndodhet një rrugëtim i rëndësishëm dhe me shumë përgjegjësi për vendin.
Ndryshe, Nagavci në legjislaturën e shtatë ishte nënkryetare e Kuvendit të Kosovës.
Postimi i plotë:
Qeveria Kurti II, si jetësim i referendumit të 14 shkurtit, do t’ia kthej dinjitetin Kosovës.
Mirënjohëse pafundësisht qytetarëve që na dhanë besimin, kryeministrit Albin Kurtit për besimin në mua që të jem pjesë e kabinetit!
Përgëzoj dhe uroj të gjithë kolegët me të cilët nga sot do të kemi një rrugëtim jo të lehtë, por të rëndësishëm, me shumë përgjegjësi dhe historik për vendin tonë!
Urime dhe suksese edhe deputetëve të legjislaturës së tetë në udhëheqjen e kryetarit të Kuvendit Glauk Konjufca!
Me nder, përkushtim, punë dhe palodhshmëri do t’i përmbushim përgjegjësitë tona, të ndërmarrim ndryshime të rëndësishme dhe bëjmë Kosovën vend të mundësive e barazisë.
Nga nesër na pret puna!
Kosovë, na priftë e mbara!/KP