Ministria e Shëndetësisë ka bërë të ditur se vendimet e sotme të Qeverisë në detyrë për heqjen e kufizimeve të lëvizjes për qytetarët janë marrë sipas propozimeve të kësaj ministrie, bazuar në situatën aktuale epidemiologjike, e cila gjatë këtij muaji ka rezultuar të jetë më e qetë.
Sqarimi i Ministrisë së Shëndetësisë vjen pas reagimeve të ndryshme rreth masave të fundit antiCOVID-19.
Qeveria në detyrë e Kosovës tha se vendimin për heqjen e kufizimit të lëvizjes për qytetarët e kishte bërë me rekomandim të IKSHPK-së dhe Bordit Këshillëdhënës, por kjo u mohua nga Lul Raka, anëtar i Bordit Këshillëdhënës, sipas të cilit asnjë anëtar i Bordit nuk ishte konsultuar paraprakisht për një gjë të tillë.
Në një komunikatë për media, Ministria e Shëndetësisë ka bërë të ditur se sipas të dhënave të Institutit Kombëtar të Shëndetësisë Publike, shkalla e sëmundshmërisë nga infeksioni COVID-19 është 120/100.000 banorë, ndërsa shkalla e pozitivitetit të mostrave të testuara është 13.1%.
“Kjo është arsyeja pse janë ndërmarra disa masa për t’i dhënë më shumë hapësirë veprimtarive të rëndësishme jetësore. Në bazë të vendimeve të sotme, parimisht, mbesin në fuqi pothuajse shumica e masave të ndërmarra më herët përveç heqjes së orës policore në komunat në “zonën e kuqe”, e cila tashmë si masë nuk ka ndonjë ndikim pozitiv, duke qenë që së fundi në këtë zonë kanë qenë vetëm katër komuna, si dhe kthimi i mësimit me prani fizike në fakultete, duke respektuar Manualin për parandalimin e përhapjes dhe luftimin e COVID-19”, thuhet në komunikatë.
MSH thotë se kategorizimi i komunave do të vazhdojë të bëhet edhe më tej bazuar në numrin e rasteve pozitive në 100.000 banorë brenda një jave për të përcjellë ecurinë epidemiologjike COVID-19.
Sa u përket testeve PCR për ata që hyjnë në Kosovë, kjo masë ka qenë e vendosur edhe më parë dhe nuk është e re, dhe ka vlejtur për të gjithë udhëtarët që vijnë në Kosovë nga shtetet me rrezik të lartë sipas klasifikimit të ECDC-së dhe bazuar në parimin e reciprocitetit, thuhet më tej në komunikatë.
Sa u përket institucioneve ekzekutive dhe atyre këshillëdhënëse, Ministria e Shëndetësisë do të vazhdojë t’i trajtojë rekomandimet dhe çështjet që ngrihen prej tyre, duke përcjellë me kujdes situatën epidemiologjike.
Ndryshimi apo përkeqësimi eventual i situatës do të përcillet me masa adekuate, pa përjashtuar edhe kthimin e kufizimeve, ndërkohë që qytetarët rekomandohen që të veprojnë sipas udhëzimeve të IKSHPK-së për t’u mbrojtur nga infeksioni COVID-19, përfundon komunikata për media e Ministrisë së Shëndetësisë./KosovaPress