Komisioni për Çështje të Sigurisë dhe Mbrojtjes ka marrë vendim për shpalljen e konkursit për komisioner të Agjencisë për Informim dhe Privatësi. Ndërsa panel vlerësues do të jenë anëtarët e po të njëjtit komision.
Kryetari i këtij komisioni, Bekë Berisha tha se kjo pozitë është shumë e rëndësishme dhe duhet të zgjedhet një individ i cili merr votat e të gjithë deputetëve.
Për shkak të dështimeve për zgjedhjen e komisionerit të Agjencisë për Informim dhe Privatësi në të kaluarën, Berisha kujtoi se ka pasur ide për të ndryshuar ligjin, duke ulur pragun e votave që duhet të marrë komisioneri.
Porse, theksoi se një gjë e tillë është refuzuar nga Zyra e Bashkimit Evropian dhe shoqëria civile.
Berisha: Duhet të zgjedhet një komisioner që ka shumicën e votave të deputetëve
“Kjo pozitë është shumë e rëndësishme dhe duhet të zgjedhet një individ që merr shumicën e votave të deputetëve. Si përfundim, ligji është në fuqi dhe na obligon të procedojmë me hapjen e konkursit”, tha ai.
Deputeti Enver Dugolli tha se nuk është e nevojshme të ndryshohet ligji, teksa propozoi të procedohet drejtpërdrejt me shpalljen e konkursit.
Dugolli: Jemi vonuar që të zgjedhim komisionerin
“Ndoshta jemi vonuar, që të zgjidhet komisioneri për Informim dhe Privatësi. Kështu që, unë jam për, që të procedohet me shpalljen e konkursit”, tha Dugolli.
Edhe deputeti Elmi Reçica tha se tash ka një stabilitet të votave dhe se duhet të procedohet në bazë të rregullave.
Reçica: Tash ka stabilitet të votave
“Ne që kemi qenë në mandatin e kaluar e dimë që ka pësuar vendi, ka pësuar ai Agjencion dhe kanë pësuar të gjithë. Ka qenë e pamundur dhe tash besoj që ka një stabilitet të votave, dakordohemi saktësisht”, u shpreh ai.
Sqarime për emërtimin e pozitës “Komisioner i Agjencisë për Informim dhe Privatësi”, kërkoi deputetja Shqipe Selimi, e cila tha se termi “informim” duhet të sqarohet pse ndodhet aty.
Selimi: Kush e ka miratuar këtë emërtim të tillë
“A ka mundësi me e sqaruar se kush e ka miratuar këtë emërtim të tillë dhe jam për që të miratohet komisioni dhe unë mendoj si shumicë siç jemi brenda komisionit, besoj se duhet të jemi të gjithë në komisionin vlerësues”, tha ajo.
Idenë e Selimit e mbështeti edhe bashkëpartiaku i saj, Arbër Rexhaj, ku me 6 vota për dhe 2 kundër është vendosur që në panelin vlerësues për zgjedhjen e komisionerit të Agjencisë për Informim dhe Privatësi të jenë anëtarët e Komisionit për Çështje të Sigurisë dhe Mbrojtjes./N.Jakupi/ KP