Kryetari i Nismës Socialdemokrate, Fatmir Limaj iu ka kërkuar bashkëvendëseve të tij në Malishevë që ditën e zgjedhjeve më 14 shkurt të votohet partia e tij.
Derisa ka përmendur angazhimin gjatë luftës në këtë zonë, Limaj gjatë tubimit elektoral në bastionin e tij tha se Malisheva duhet të kthehet në referendum, për t’iu treguar të tjerëve rreshtimin me çlirimtarët.
Limaj: Porosia ime për krejt bashkëvendësit e Malishevës është që me 14 shkurt të votohet Nisma
Video
“Ne si bashkëluftëtarë kemi qenë bashkë kur ka pasur nevojë atdheu për ne, kur ka pas populli i Llapushës për ne dhe populli i Kosovës. Ne kemi vazhduar rreshtimin dhe nuk ka pas nevojë për zhgënjim, ne për asnjë qastë dhe asnjëherë nuk ia kemi kthyer shpinën atdheut, ne kemi qenë këtu me ju. Prandaj nuk ka nevojë, ne asnjëherë në asnjë rast të premtojmë për të mashtruar njerëz. Besimi ynë me Llapushën nga askush nga asgjë, nuk mund të thejë besimin e ndërtuar tash e 30 vite me komunën e Malishevës dhe qytetarët e saj…Porosia ime për krejt bashkëvendësit e mi të Malishevës është mirë e keni pa, i keni prit e përcjell dhe me 14 shkurt vota për Nismën Social Demokrate… Malisheva kthehet në një referendum. Referendum për t’i treguar të gjithëve të tjerë se ne nuk nënshtrohemi askund tjetër, përveç aty ku e dina dhe kemi qenë gjithmonë. Me çlirimtarët”, tha ai.
Limaj duke adresuar kritika ndaj partive tjera që kanë kërkuar vota në Malishevë, shprehu edhe një cilësim ndaj tyre, “Ecin sikur ingjet”.
Limaj: Pash Zoti a po iu vjen marre me na kallxu neve qysh duhet atdheu, ecin si ingjet
Video:
“Si mund të rreshtohet ndryshe Llapusha, për këtë deshta t’iu dërgoj një porosi djemve në Prishtinë se po vinë e po na shesin patriotizëm në Llapushë. Pash zoti a po iu vjen marre me na tregu neve qysh duhet atdheu. Pash zoti, vijnë këtu, a i keni pa qysh ecin si ingjet. As me ecë nuk dinë e lere me qu vendin përpara. Merre me mend ata me dalë para Vuçiqit”, tha ai.
Krahas kësaj, Limaj u shpreh i bindur se zëri i Nismës do të dëgjohet në Kuvendin e Kosovës edhe pas zgjedhjeve të 14 shkurtit.
Limaj: Anë e kënd Kosovës po rreshtohen me çlirimtarët
Video
“Njerëzit në Kosovë, sikur kurrë më parë e kanë kuptuar sa e rëndësishme është kauza jonë e vlerave kombëtare dhe njerëzore. Nga gryka e llapit, në Kaçanik, nga aty në Istog e në shalë të Bajgores e Dragash, e anë e kënd Kosovës dhe gjithë ato familje janë rreshtuar dhe po rreshtohen me çlirimtarët. Ajo çka unë po shoh sot, ashtu siç kemi biseduar ditëve të kaluara ju kemi pa që keni prit e përcjell njerëzit që kanë vizituar komunën tonë. E di se çka nuk kanë folur me premtime, por në fakt ata për të marrë dhe mashtruar ndonjë votë nuk kanë kund tjetër, duhet me rrejt, shpif ose me premtu pasi me zemër dhe besim në Malishevë, jemi ne këtu dhe ju jeni bashkë me ne”, tha ai.
Në këtë tubim zgjedhor, foli edhe sekretari i Përgjithshëm i Nismës, Bilall Sherifi, i cili iu bëri ftesë malishevasve të rreshtohen rreth numrin 121 në zgjedhjet 14 shkurtit.
Sherifi: Ju bëjë ftesë që të rreshtohemi rreth numrin 121
Video:
“Nga këtu ju bëjë ftesë që të rreshtohemi rreth numrin 121. Numri 121 ka bërë historinë gjatë luftës, do të bëjë historinë edhe me 14 shkurt. Po na thonë se po bëni fushatë të egër, a ka gjë më të egër se të mohosh gjenocidin që ushtria dhe policia e Serbisë ka kryer në Kosovë. Po na thonë ofroni program, po nuk ka program dhe pikë rreshtim në program më të fortë se të jesh në mbrojtje të vlerave të UÇK-së”, tha ai.
Malishevasve iu prezantuan edhe kandidatët për deputetë të Nismës në këtë qytet./E.Zeqiri /KosovaPress